Әкиәттәр нигеҙендә тәрән фәлсәфә ята

Районыбыҙҙа даими рәүештә “Һаумы, һаумы, әкиәт!” конкурсы үткәрелеп килә. Быйылғы уҡыу йылында ла район мәктәптәре уҡыусылары һәм балалар баҡсалары тәрбиәләнеүселәре араһында көсөргәнешле бәйге уҙҙы. Унда бөтәһе 12 белем биреү учреждениеһынан тел ижадының йәш оҫталары ҡатнашты. Конкурс ике турҙа уҙҙы: тәүгеһендә видеояҙмалар баһаланды. Икенсе турҙа иһә бәйгеселәр үҙҙәре ижад иткән әкиәттәрен башҡорт, татар, рус һәм инглиз телдәрендә тасуири һөйләне. Ойоштороусылар сәсән һүҙле балаларҙы асыҡлау, телмәр тотоу, фекер йөрөтөү һәләттәрен, хәтер ҡеүәһен, тауыш үҙенсәлектәрен үҫтереүҙе маҡсат итеп ҡуйҙы.

Бәйге шартына ярашлы, һәр сығыш яһаусының ихласлығы, тамашасыларҙы йәлеп итеү һәләте, актерлыҡ кәүҙәләнеше, сәхнәлә үҙен тота белеүе, кейемдәренең темаға тап килеүе иғтибар үҙәгенә алынды.

Жюри сығыш яһаусыларҙы тел буйынса һәм йәштәренә ҡарап бер нисә төркөмгә бүлеп баһаланы. Бәйге бик йәнле барҙы. Һәр бәйгесе ентекле әҙерлек менән килгән. Шулай итеп, конкурстың район этабында мәктәпкәсә йәштәгеләр араһында Шәрәфетдинова Сөмбөл (Абҙан, Ф.Х.Әлимғолова) — 1-се, Хәлилов Таһир (“Тирмәкәй”, Г.Р.Ғималиева) — 2-се, Степанова Ксения (“Тирмәкәй”, С.Б.Тараканова) 3-сө урынды яуланы. Был йәш категорияһында Гәрәева Диана (“Әкиәт”, А.А.Атанғолова) “Өмөт” номинацияһында билдәләнде.

7 — 10 йәшлек балалар араһында Фәтҡуллина Гөлсәсәк (2-се Архангел, О.В.Губачева) — I, Хәсәнова Дания (Ҡыҫынды, Г.М.Абдуллина) һәм Зәйнуллина Милана (1-се Архангел, Р.С.Әхмәтйәнова) II урынды биләһә, Максим Горький мәктәбенән Усарҡулова Камила (М.Э.Т.Йәнешева) һәм Харитонюк Дмитрий (Д.М.Мусина) III урында баһаланды. Был төркөмдә Ҡунаҡбаева Зарина (Абҙан, З.А.Ғәзизуллина) “Еңеүгә ихтыяр көсө” номинацияһына лайыҡ булды.

11 — 15 йәштәгеләрҙән Бадранова Регинаға (Тәүәкәс, Ә.Р.Хисмәтуллина) — 1-се, Касаева Алтынай (2-се Архангел, Р.Ә.Сәлихова) һәм Хәбибуллина Викторияға (2-се Архангел, Е.В.Гурьяновская — 2-се, Хәмзина Сәриә (Зәйет, Л.С.Усманова) һәм Вәлиева Дианаға (Ырныҡшы, З.Т.Вашкевич) 3-сө урын бирелде.

Сит телдә сығыш яһаусыларҙан Дунаева Анастасия (1-се Архангел, Д.Ф.Вәлиева), Губачев Кирилл (2-се Архангел, И.М.Абрамчук) һәм Әхтәмов Аяз (Валентиновка, А.Р.Ҡунаҡбаева) иң яҡшыларҙан тип табылһа, Ибраһимов Салауат “Еңеүгә ихтыяр көсө” номинацияһында билдәләнде.

Быйылғы бәйгелә ҡатнашыусыларҙың ныҡлы әҙерлеген билдәләргә мөмкин. Ҡайһы берҙәре оҫта һөйләүе менән тамашасыларҙы хайран ҡалдырҙы. Балаларҙың һәр сығышы үҙенсәлекле һәм иҫтә ҡалырлыҡ булды. Конкурсанттарҙы әҙерләгән тәрбиәселәр сәхнәгә сығарыласаҡ әкиәттең эстәлеге генә түгел, ә тәрбиәүи әһәмиәте, халыҡсанлығы, тамашасы хөкөмөнә тапшырыу формаһы өҫтөндә лә ныҡлы тырышлыҡ һалған. Әкиәттәр балаларға дуҫлыҡ, тоғролоҡ, ҡыйыулыҡ, зирәклек, тәбиғәткә, тирә-йүнгә һаҡсыл ҡараш кеүек сифаттар хаҡында төшөнсә бирҙе.

Сығыштарҙы ҡарағандан һуң баһалама ағзалары районыбыҙҙа йәш таланттарҙың күп булыуына тағы ла бер ҡат инанды тиһәк һис хата булмаҫ. Әкиәттәр нигеҙендә тәрән фәлсәфә ятҡанын, бәләкәстәрҙең холоҡ-фиғеле формалашыуында ҙур йоғонто яһауын фәҡәт бала үҙе генә тойомлай. Әкиәти персонажға оҡшарға теләй, яуызлыҡтан ҡаса, яҡшылыҡты эшләргә ашыға. Тимәк, был тел ижады баланың шәхес булып формалашыуында ғәйәт ҙур роль уйнай. Күркәм сара һәр кем күңеленә ыңғай тәьҫораттар, әкиәти күңел кисерештәренә һалып бер тында үтте лә китте.

Рәғиҙә Ғиззәтуллина.

Автор фотоһы.