Һоҡланғыс уңыш

Тәүге көндә бәйгеселәр тест һорауҙарына яуап бирһә икенсе көндө ғәмәли белемдәрен һынап ҡараны. Оҙондар мәктәбенең 10-сы класс уҡыусыһы Луиза Әюпова “Малсылыҡ” йүнәлеше буйынса сығыш яһаны һәм яҡшы һөҙөмтәләргә ирешеп, республика буйынса 3-сө урын яуланы. Луиза, ғөмүмән, бар яҡтан да һәләтле ҡыҙ. Уның был уңышы беҙҙең өсөн айырыуса ғорурлыҡ!

Йәш булыуға ҡарамаҫтан олипиадала ҡатнашыусыларҙың тармаҡтар эшмәкәрлеген яҡшы үҙләштереүе, ҡыҙҙарҙың малайҙар менән бер рәттән ауыл хужалығы механизацияһында, үҫемлекселектә, малсылыҡта мәғлүмәтле булыуы һоҡландырҙы. Баһалама комиссияһы ағзаларына өҫтәлмә рәүештә “Үҙенсәлекле яуап”, “Буласаҡ эшҡыуар”, “Креатив фекер” кеүек номинациялар индерегә тура килде. БР Ауыл хужалығы министрлығы вәкилдәре лауреаттарға Дипломдар, барлыҡ ҡатнашыусыларға Рәхмәт хаттары, иҫтәлекле бүләктәр тапшырҙы. Шуныһын әйтеү мөһим, был ҡотлау ҡағыҙҙары мәктәпте тамамлағандан һуң аграр университетҡа уҡырға ингәндә ҙур роль уйнаясаҡ.

Сара бик матур итеп ойошторолған: бәйге дауамында ирекмәндәр эше алып барылды, балалар зауыҡлы итеп йыһазландырылған ятаҡханала булып, студент тормошо менән йәшәп ҡараны.

Тағы ла шуны өҫтәгем килә, 2020 йылдың ғинуары аҙағында 9 — 11 кластар өсөн Башҡорт дәүләт аграр университеты тарафынан ижади конкурс ойоштороласаҡ. Уҡыусыларыбыҙ ошондай бәйгеләрҙә әүҙем ҡатнашып, үҙҙәренең белемдәрен үҫтерһә ине тигән теләктә ҡалам.

Люциә Никитина,

Оҙондар мәктәбе уҡытыусыһы.