Йәмле июль илһамландыра

Яландарға сығып еләк бешкәнен күҙәтеп, өлгөрөү менән күмәкләп йыйырға сығабыҙ, хуш еҫле дарыу үләндәрен дә ҡышҡылыҡҡа хәстәрләйбеҙ: мәтрүшкә, меңъяпраҡ, юл япрағы, кеүек файҙалы үләндәр иғтибарҙы тартып тора. Уларҙан тәмле сәйҙәр, төнәтмәләр эшләйбеҙ. Ялан-урманда йөрөү  беҙгә боронғо йолаларҙы яңыртыу ғына түгел, ә көс-ҡеүәт туплау, сәләмәтлекте нығытыу сараһы ла. Ҡояшта ҡыҙарып бешкән тупар, ҡурай еләктәрен, бөрлөгәнде   матур уйҙар менән кәрзинебеҙгә тултырабыҙ. Йырлап-бейеп, хатта бер-беребеҙгә ҡыҙыҡлы хәбәрҙәр һөйләп, йәйҙең йәмле көндәрен шулай күңелле уҙғарабыҙ. Был мәлдәрҙә тыуған яғыбыҙҙың аҡландары үҙе оло сәхнәгә әйләнә. Саф һауала бал, сәскә еҫтәре аңҡый. Күңелебеҙҙә — илаһи матурлыҡ, йән тыныслығы. Ошо инде ысын  бәхет!

   Байлыҡ-муллыҡ айында фотоға төшөп, “Минең йәйем” конкурсында ҡатнашырға булдыҡ. Миҙгелгә бәйле хәтирәләр, уңыштарға бай июль барыбыҙҙы ла илһамландыра, дәртле сығыштарға ҡанат ҡуя.

“Гөлнәзирә” фольклор ансамбле ағзалары.

Убалар ауылы.