Һаҡ булығыҙ – ҡыйыҡтар ауырайҙы

Райондың граждандар оборонаһы һәм ғәҙәттән тыш хәлдәр буйынса белгес А.И.Антипин хәбәр итеүенсә, һуңғы көндәрҙә яуым-төшөмдөң күп булыуы арҡаһында, йорт, бина баштарында ҡар ҡалынайҙы. Шулай уҡ көндөҙ температураның нуль градустан юғары, ә төндә уның түбәнәйеүе сәбәпле, ҡыйыҡтарҙа боҙбармаҡтар барлыҡҡа килде.

Ошо көндәрҙә ғәҙәттән тыш хәлдәрҙе иҫкәртеү һәм янғын хәүефһеҙлеген тәьмин итеү буйынса комиссия ултырышы уҙҙы. Сарала район хакимиәте башлығы И.Н.Әминев, уның урынбаҫарҙары, 63-сө янғын һүндереү часы начальнигы Н.Ф.Вәлиев, ауыл хакимиәттәре башлыҡтары, ойошма һәм предприятие етәкселәре ҡатнашты. Һөйләшеү барышында биналарҙың һәм ҡоролмаларҙың ҡыйығында ҡар йыйылыу сәбәпле хәүефһеҙлек ҡағиҙәләрен тәьмин итеү мәсьәләһе күтәрелде.