“Йөрәк һәм көйлө ҡылдың берҙәм яңғырашы” һәләтлеләрҙе бергә тупланы

Сәхнә түренә бер-бер артлы  йырсылар, бейеүселәр сыҡты, шулай уҡ йыйылыусылар шиғри шәлкемдәр тыңлап, рухын байытты. Дәртле  казак бейеүе, башҡорт,  рус, сыуаш халыҡтарының   лирик йырҙары  йөрәк ҡылдарын сиртте. Кисәнең сағыу йондоҙҙары  — Бөтә Рәсәй конкурстары еңеүсеһе Алена Сәйфуллина һәм  “Амбер” рок-төркөмө лидеры Татьяна Теплова булды.  Уларҙың  сығышы программаның  матур биҙәге ине. Тағы ла бер йылы һәм тулҡынландырғыс  мәл: фестивалдә ҡатнашыусы  Алмаз Туҡаевты  барыһы ла тыуған көнө менән тәбрикләне. Бындай ваҡиға  үҫмерҙең генә түгел, райондаштарҙың да күңелендә  йылы хис-тойғолар ҡалдырҙы.

Байрамда архангелдәрҙе йыр-моң,  дәртле-дарманлы бейеүҙәр менән йөрәктәренә ут-ялҡын өҫтәгән һәләтлеләргә — Дипломдар, киң ҡоласлы сара таянысы булған партнерҙарға  Рәхмәт хаттары тапшырылды.

Ойоштороусылар: хәйриә  платформаһы  “СберВместе”,  Руслан Дәүләтшин,  “Өфө ҡалаһы тауышы” проекты етәксеһе Камила Мирхәйҙәрова, автор-башҡарыусы Алена Сәйфуллина, Азат Шәрәфетдинов, “БашУлей” глэмпингы етәксеһе Рафаэль Ғиззәтуллин.

Миләүшә Бәширова.

И. Куркова фотоһы.