Күмәкләгән — яу ҡайтарған

Үрге Ләмәздең тәбиғәте иҫ китес матур. Ошо гүзәллекте тәртиптә тотоу — беҙҙең бурысыбыҙ тип, тыуған яғыма ҡайтҡан һайын өмәләр ойоштороу мөһимлеге тураһында уйландым. Был юлы Рәсәй көнөндә ауылдаштар һәм сит төбәктәрҙән ҡайтҡандар менән тарихи урыныбыҙҙы таҙарттыҡ. Был изге эштең башланғысы “Сестра” позывнойлы ирекле отрядта ҡатнашыусы булды. Шишмәне тергеҙеүҙә Әфҡәт Морсалов — ойоштороу яғынан,”Егерь” позывнойлы МХО-ла ҡатнашыусы финанс яҡтан ярҙам күрһәтте. Зәлиә һәм Салауат Рәжәповтар ҙа сараның уртаһында ҡайнаны. Һәр кем ҡулдан килгәнсә тырышты: кәңәштәр, хуплау һүҙҙәре, бергәләшеү ҙә “Күмәкләгән — яу ҡайтарған” тигәнде раҫланы.

Был көндө иң тулҡынландырғысы — МХО яугирҙәренең әсәләренә миҙал тапшырыу булды: Сәриә Морсалова һәм Маһира Хөснөтдинова Ватанды һаҡлаусы илһөйәр улдар үҫтергән.

Бөтә эштәргә нөктә ҡуйылғас, сәй табыны янына йыйылдыҡ. Зилфирә Ғәлләмованың гармун көйҙәрен тыңлап, дәртле йырҙарына ҡушылып, күңел астыҡ. Бындай осрашыуҙар, өмәләр беҙҙе берләштерә, Тыуған илебеҙгә һөйөү хистәрен арттыра.

Шәп яңылыҡ барыбыҙҙы ла ҡыуандырҙы, сөнки элек сылтырап аҡҡан шишмәне ҡалҡып торған торба ғына хәтерләтте, унда тимер-бетон ҡулса ҡуйылғайны. Хәҙер иһә йыраҡтан үк башы ябылған изге ер үҙенә әйҙәп тора. Бер һүҙ менән әйткәндә, ауыл йәме! Яҡшы уйҙар менән килгәндәр саф һыуын тәмләүҙән ҡәнәғәт ҡаласаҡ.

Люциә Моратова.

Белорет районы.

Автор:Рахимов А.

Читайте нас

Редакция һайлауы