Телебеҙ яҙмышы — үҙебеҙҙән тора

 Белем биреү усаҡтарында  уҡыусылар  менән бер рәттән төрлө ойошма, учреждение,  йәмғиәт һәм  редакция, шулай уҡ   район мәҙәниәт йорто хеҙмәткәрҙәре  милли кейемдә, күтәренке кәйефтә диктант яҙырға килде.

 Тел — халҡыбыҙҙың тарихы, байлығы.  Башҡорт телен   йәшәтеүҙә, туған телде өйрәнеүгә вайымһыҙ булмаһаҡ ҡына,  уны һаҡлай аласаҡбыҙ.  Райондаштарҙың  ғәмле һәм әүҙемдәре  акцияның мөһимлеген яҡшы аңлағанға  күрә,  быйыл да  белемдәрен тикшереп, рухын байытты. 1-се Архангел мәктәбендә диктантты  —  башланғыс класс уҡытыусыһы Альбина Сөләймәнова, 2-селә башҡорт теле уҡытыусыһы  Резида Маликова уҡыны. Айгөл Йәмилеваның “ Беҙ  — ил балалары”н  барыбыҙ ҙа  ғорурлыҡ тойғоһо кисереп яҙҙыҡ. Төрлө милләт вәкилдәренең  дуҫ  йәшәүе, бер-береһен хөрмәт итеүе, ауыр мәлдәрҙә лә ярҙамлашып, бер туғандай   татыу булыуҙарына  арналған тексты, моғайын, барыһы ла  “яҡшы”   билдәгә яҙғандыр, тип уйлайым.

  —   Милли кейем һәм Халыҡ-ара диктант көндәрендә үҙәк район дауаханаһы хеҙмәткәрҙәре һәм  “Хазина” халыҡ фольклор ансамбле ағзалары, диктант яҙырға йыйылдыҡ. Мәҙәниәт йорто  хеҙмәткәрҙәре тирмә ҡорҙо, уның алдына өҫтәлдәр, ултырғыстар ҡуйылды. Матур итеп биҙәнеләр. “Беҙ — ил балалары” тексын   мәҙәниәт йортоноң художество етәксеһе Сәриә Мағазова уҡыуында иғтибар менән  тыңланыҡ. Барыбыҙ ҙа тырышып яҙҙыҡ. Башҡортостандың киләсәге,  телебеҙ  яҙмышы беҙҙән тора, шуға күрә ошондай акцияның әһәмиәтен һәр кем төшөнһөн ине,- шәфҡәт туташы Земфира Ғафарова.

—  Халыҡ-ара диктантта халыҡ әүҙем ҡатнашты. Был көн мәктәп байрам төҫө алды. Һөҙөмтәләр бик яҡшы. Шуныһы шатлыҡлы: барыһы ла тырышып, “4” һәм “5” билдәләренә яҙған,-ти башҡорт теле уҡытыусыһы  Резида Маликова.