Башҡортостанда көн һайын 130-ға яҡын йорт газға тоташтырыла

«Газпром төбәк-ара газ Өфө» ЯСЙ генераль директоры – «Газпром газ бүлеү Өфө» асыҡ акционерҙар йәмғиәтенең идара итеүсе ойошмаһы Альберт Лоҡманов, Республиканы газ менән тәьмин итеүҙе һәм газлаштырыуҙы үҫтереү программаһын тормошҡа ашырыу дауам итә, тип хәбәр итте. 2026-2030 йылдарға пландар 61 ҡасаба эсендә һәм 36 ҡасаба-ара газ үткәргес төҙөүҙе күҙ уңында тота. Был 17 муниципалитеттың быға тиклем зәңгәр яғыулыҡҡа тоташтырылмаған 60 тораҡ пунктында 6 280 йортҡа газ үткәреү мөмкинлеген бирәсәк.

2021 йылдан 25 райондың 107 тораҡ пунктына газ барып еткән. 8 169 йортҡа газ үткәреү мөмкинлеге булдырылып, шуларҙың 4 345-е газға тоташтырылған.

Башҡортостан Рәсәй Президенты Владимир Путин инициативаһы менән тормошҡа ашырылған социаль газлаштырыу программаһы буйынса илдең ҙур төбәктәре араһында беренсе урынды биләй. 2021 йылда дәүләт башлығы элек газға тоташтырылған тораҡ пункттарҙағы йорт хужалыҡтары сиктәренә бушлай газ үткәреүҙе күҙ уңында тотҡан законға ҡул ҡуйҙы. Башҡортостанда был программа буйынса 72,8 мең йортҡа зәңгәр яғыулыҡ барып еткән дә инде.

– Барлығы 85 меңдән ашыу ғариза ҡабул иттек. Газ бүлеү селтәрҙәре 80,1 мең йорт сиктәренә алып барып еткерелде, – тип билдәләне Альберт Лоҡманов. – Эш темптары тураһында һүҙ алып барғанда, көнөнә 130-ға яҡын йорт газға тоташтырыла.

Хәтерегеҙгә төшөрәбеҙ: Рәсәй Президенты Владимир Путин социаль газ үткәреү программаһын газлаштырылған тораҡ пункттар сиктәрендә урынлашҡан баҡса ширҡәттәрендәге торлаҡ йорттарға таратырға ҡушты.

Коммерцияға ҡарамаған баҡса ширҡәттәре биләмәләрен инвентарлаштырыу һөҙөмтәләренә ярашлы, 20 муниципалитеттың 433 баҡса ширҡәтендә 15 487 йортҡа газ үткәрергә мөмкин. Халыҡтан 4 меңдән ашыу ғариза ҡабул ителгән, селтәрҙәр 1 687 йорт сигенә тиклем алып барып еткерелгән. Уларҙың 1 062-һе зәңгәр яғыулыҡҡа тоташтырылған да инде. Баҡса ширҡәттәрендә көн һайын 15 самаһы йорт газға тоташтырыла.

Альберт Лоҡманов билдәләүенсә, Башҡортостанды газ менән тәьмин итеүҙе үҫтереү буйынса программаларҙы тормошҡа ашырыуҙа республика тарафынан бирелгән сертификаттар ҙур ярҙам булған. Был ярҙам сараһы менән Бөйөк Ватан һуғышында ҡатнашыусылар, хәрби хәрәкәттәр инвалидтары, аҙ тәьмин ителгән инвалидтар, инвалид балалар тәрбиәләгән ғаиләләр, аҙ тәьмин ителгән күп балалы ғаиләләр, шулай уҡ махсус хәрби операцияла ҡатнашыусылар һәм уларҙың ғаилә ағзалары файҙалана ала.

– Беҙ 11 697 сертификат буйынса эш бара, 11 309 йорт газға тоташтырылған да инде, – тип өҫтәне Альберт Лоҡманов.

Башҡортостан Башлығы «Газпром межрегионгаз Өфө» коллективына берлектәрге һөҙөмтәле эш өсөн рәхмәт белдерҙе һәм газ үткәреү буйынса ентекле пландарҙы тикшереү өсөн эш кәңәшмәһе үткәрергә ҡушты.

– Беҙҙә газға тоташтырыу кимәле яҡшы. Әммә кешеләр барыбер газ үткәреүҙе һорап мөрәжәғәт итә, айырыуса республиканың төньяҡ-көнсығышында һәм көньяғында, – тине Радий Хәбиров. – Шуға күрә эште дауам итәсәкбеҙ.