Шахматсылар дуҫтарын йыйҙы

Ошо көндәрҙә Ғафури районы Имәндәш ауылында махус хәрби операцияла һәләк булған Рәсих Муллашев иҫтәлегенә арнаған шахмат буйынса район-ара турнир ойошторолдо. Ярышта Архангел, Ғафури (Имәндәш, Ҡауарҙы, Сәйетбаба, Красноусол) һәм Ҡырмыҫҡалы районы шахматсылары үҙҙәренең һәләттәрен асыҡланы. Бәйгелә бишәр уйынсынан торған йыйылма командалар үҙ-ара көс һынашты. Сара башында яугир хаҡында мәғлүмәт менән танышҡас, ҡыҙыу уйындар башланды.

Йыйылма командаларҙың сәмле уйындарынан һуң, шәхси беренселектә еңеүселәр асыҡланды. Беренсе таҡтала – Вилдан Ҡунаҡҡолов, икенсе таҡтала Альберт Рәхимов – “бронза” һәм дүртенсе таҡтала Юлай Мәзитов – “алтын” миҙал яуланы. Мәрәйҙәр буйынса йыйылма командалар араһында имәндәштәр – беренсе, ҡауарҙылар – икенсе, архангелдәр өсөнсө урынға сыҡты. Мәрәйҙәр буйынса йыйылма командалар араһында ҡауарҙылар – беренсе, ҡырмыҫҡалылар – икенсе, архангелдәр өсөнсө урынға күтәрелде. Блиц-турнирҙа бөтә шахматсылар ҙа үҙ-ара уйындар үткәрҙе. Альберт Рәхимов (Архангел) биш турҙа ла яҡшы уйын күрһәтеп, чемпион исемен яуланы, икенселә – Рәис Абдуллин (Ҡауарҙы), өсөнсөлә – Сабир Исхаҡов (Ҡауарҙы).

Еңеүселәргә Маҡтау ҡағыҙҙары, кубоктар, миҙалдар һәм иҫтәлекле бүләктәр тапшырылды.

Автор:Рахимов А.

Читайте нас

Редакция һайлауы