Үҙәк район дауаханаһына яңы автомобиль тапшырылды

Ошо көндәрҙә Башҡортостандың медицина учреждениеларына махсус мөмкинлектәр менән яңы автомобилдәрҙән асҡыстар тапшырылды. Өфөләге 18-се ҡала дауаханаһы алдындағы майҙансыҡта республиканың 37 медицина ойошмаһы вәкилдәренә “Лада Гранта Лифтбек” базаһында 43 транспорт сараһын тапшырыу тантанаһы үтте. Автомобилдәр “Һаулыҡ һаҡлау” милли проектының “Һаулыҡ һаҡлауҙың беренсел звеноһын модернизациялау” программаһы сиктәрендә һатып алынған. Рәсәй етештереүендәге заманса “Лада Гранта Лифтбек” машиналары күп функциялы. Улар фельдшерҙарҙы ашығыс ярҙам саҡырыуҙарына, анализдар һәм пациенттарҙы йөрөтөү өсөн ҡулланыласаҡ. Багажникта носилкалар урынлаштырылған, улар кәрәк булғанда ауыр хәлдәге пациентты медицина учреждениеһына килтереү өсөн ҡулланылырға ярҙам итәсәк. Бының өсөн салон эсендә шулай уҡ трансформацияланыусы ҡабул итеү ҡоролмаһы урынлашҡан. Был универсаль автомобилдәр ҡалала ла, ауылда ла ҡулланыу өсөн уңайлы буласаҡ.
Сарала БР Хөкүмәте премьер-министрының беренсе урынбаҫары Урал Килсенбаев, республиканың Һаулыҡ Һаҡлау министры Айрат Рәхмәтуллин, медицина учреждениелары етәкселәре һәм водителдәр ҡатнашты.
Тантананы асып, Урал Килсенбаев, республика ҡалалары һәм райондарының медицина учреждениелары өсөн автомобилдәр тапшырыу яңы йыл сюрпризы булды, тип билдәләне.
— Башҡортостан Башлығы Радий Хәбиров һәм дөйөм алғанда төбәк етәкселеге һаулыҡ һаҡлау өлкәһенә айырыуса иғтибар бүлә. Ковид ваҡытын иҫкә төшөрһәк, башҡа төбәктәрҙә койка-урындар, тәьминәт буйынса ҙур проблемалар булған саҡта, республикабыҙҙа биш инфекцион госпиталь төҙөлдө, улар бөгөнгө көнгә тиклем эшләй. Бынан тыш, һуңғы йылдарҙа ғына Волга буйы федераль округында 700-ҙән ашыу фельдшер-акушерлыҡ пункты төҙөлдө, уларҙың яртыһы (360-тан ашыу ФАП) Башҡортостанда төҙөлдө. Был төбәк етәкселегенең һаулыҡ һаҡлауҙың беренсел звеноһына ҙур иғтибар биреүе хаҡында һөйләй. Әммә ҡайһы берҙә пациентты ҡотҡарыу һәм ваҡытында медицина ярҙамы күрһәтеү өсөн тиҙ арала яуап бирергә кәрәк. Был осраҡта ярҙамға махсус автомобилдәр килә, улар бөгөн район һәм ҡала дауаханаларына тапшырыла. Был автомобилдәр республика халҡына медицина ярҙамын арзаныраҡ, һөҙөмтәлерәк итер һәм бер нисә ғүмерҙе ҡотҡарырға ярҙам итер, тип ышанабыҙ, — тине ул.

Физәлиә Ғәниева.