“Әр-Рәхим” мәсете ҡасан төҙөлөп бөтөр?

Республика Башлығы менән Тура бәйләнеш башланғандан алып Башҡортостанда йәшәүселәрҙән 4122 һорау ҡабул ителгән һәм һорауҙар килеүен дауам итә, тип хәбәр итте Республикаға идара итеү үҙәге етәксеһе Дмитрий Черенков.

Телеграм-бот, шулай уҡ Башҡортостан Башлығы сайты һәм Дәүләт хеҙмәттәренең кире бәйләнеш платформаһы иң популяр элемтә сараһы булды.

Һорауҙар һаны буйынса юлдар проблемаһы беренсе килә, икенсе урында – мәғариф, өсөнсөлә – торлаҡ-коммуналь хужалыҡ.

Өфө ҡалаһы, Өфө районы һәм Стәрлетамаҡ ҡалаларында йәшәүселәр иң әүҙемдәре булып сыҡты.

Унда ҡатнашҡан журналистар араһында Башҡортостан Журналистар союзы рәйесе, “Башҡортостан” гәзитенең баш мөхәррире Вәдүт Исхаҡов та һорау бирҙе. Ул Өфөләге “Әр-Рәхим” мәсете төҙөлөшөнә бәйле булды. Радий Фәрит улы әйтеүенсә, был объектты төҙөп бөтөрөү өсөн бер нисә миллиард һум аҡса кәрәк.

– Ысынлап та, был ҡатмарлы хәл. Унда башҡараһы эштәр байтаҡ. Иң мөһиме – объектҡа анализ яһаныҡ, декабрҙә экспертиза һөҙөмтәләрен алырбыҙ. Нигеҙе, стеналары яҡшы торошта. Ҡыйығын алмаштырырға кәрәк. Быйыл манаралар менән эште тамамлайбыҙ. Хәҙер фасадты йөҙләүҙе проектлай башлайбыҙ. Йылдың тәүге яртыһында уҡ уны ныҡ ҡына эшләргә ниәтләйбеҙ. Тәүҙә тышҡы контурҙы тамамлайбыҙ, – тине Радий Хәбиров. – Иң мөһиме, финанслауыбыҙ бар. Һүҙ бер нисә миллиард тураһында бара. Йомғаҡлау суммаһы проект эштәренән һуң билдәле буласаҡ.

Радий Хәбиров мәсеттең киләһе дүрт йылда төҙөлөп бөтәсәген билдәләне.

– Өс йылда объект 80 процентҡа төҙөлөп бөтөргә тейеш. Дүрт йыл – минеңсә, аҡыллы ваҡыт, – тип билдәләне республика Башлығы.