Өс тапҡыр тикшерелә

Ташҡын осоронда Өфө предприятиелары тәүлегенә өс тапҡыр эсәр һыу сифатын тикшерергә ниәтләй. Был турала ҡала хакимиәтендә үткән оператив кәңәшмәлә “Өфө һыу каналы”ның генераль директоры Артем Чакиров хәбәр итте.

“Беҙҙең предприятиела мониторинг системаһы бар. Ул йылғалар ташҡанда һыу баҫыу зонаһына эләккән баш ҡалалағы һыу бүлеү ҡоролмалары скважиналары һанын билдәләү мөмкинлеген бирә. Ташҡынға әҙерлек планына ярашлы, 270 скважина тикшерелгән, герметиклау эше башҡарылған, һыуҙы таҙартыу һәм зарарһыҙландырыу өсөн реагенттар тупланған, ҡорамалдар әҙерләнгән, аналитик контроль үҙәге ташҡын шарттарында эшләүгә күсерелгән”, – тине ул.

Йылғалар ташҡан осорҙа һыу бүлеү ҡоролмаларына 300-ҙән ашыу элементтың эләгеүе ихтимал. Фенол, нефть продукттары, хлорлы углеводородтар махсус контролгә алынған. Эсәр һыуға өҫтәмә рәүештә 15 меңгә яҡын анализ яһала.

"Башҡортостан" гәзитенән.