Рәсәй төбәктәренә бөтә кинотеатрҙарҙы ябырға тәҡдим ителде

Рәсәй Федерацияһының Мәҙәниәт министрлығы коронавирустың таралыуына юл ҡуймаҫ өсөн илдең барлыҡ төбәктәренә 23 марттан бөтә кинотетарҙарҙы ябырға тәҡдим итте.

Шуны билдәләп үтәйек: бынан алда Мәҙәниәт министрлығы Рәсәй биләмәһендә музейҙар, театрҙар, филармониялар, цирктар һәм башҡа сәнғәт урындары өсөн ошондай сикләүҙәр индерҙе. Шуға бәйле донъяның барлыҡ мәҙәниәт усаҡтары онлайн-трансляцияға күсә. Атап әйткәндә, Башҡортостанда йәшәүселәр 25 мартта Хөсәйен Әхмәтов исемендәге Башҡорт дәүләт филармонияһы концертының тура видеотрансляцияһын ҡарай ала.

Бынан алда республикала, Рәсәйҙең башҡа 85 төбәгендәге кеүек үк, коронавирус арҡаһында юғары әҙерлек режимы индерелде. Ул мәҙәни, спорт һәм башҡа күмәк кеше ҡатнашлығындағы сараларҙы үткәрмәүҙе, шулай уҡ мәғариф учреждениеларын ситтән тороп эшләүгә күсереүҙе күҙ уңында тота.