Бында оло тарих тупланған...

Тыуған ил тыуып үҫкән ерҙән башлана. Кешегә иң ҡәҙерлеһе — тыуған тупраҡ, иң татлыһы — тәү эскән һыуың, ин йылыһы — һине йылытҡан өй усағы, иң күркәме — тыуған өйөң, иң йәмлеһе — тыуған тәбиғәтең. Бына тойоп үҫкән кешенең күңел ҡото бар. Шуларҙы ҡәҙерләгәндәр үҙ ерендәге оло һыуҙарҙың татын, ҙур уттарҙың ҡайнарлығын, яҡты донъяның ҡәҙерен, Тыуған ил тойғоһоноң ололоғон нығыраҡ белер.

Районыбыҙға быйыл — 90 йәш. Бында йәшәгән халыҡтар уның тарихына матур эштәре, татыу тормош көтөүҙәре менән яҡты иҫтәлектәр ҡалдыра. Районыбыҙҙа бөгөнгө йәштәргә сағыу өлгө булырҙай шәхестәр байтаҡ сыҡҡан. Ошоларҙы иҫәпкә алып “Инйәр” гәзите “Архангелем — тыуған төйәгем” тип аталған яңы рубрика асты.

Хөрмәтле уҡыусыларыбыҙ, һеҙҙән районыбыҙ тарихына ҙур өлөш индергән шәхестәр, ойошмалар һәм предприятиелар, хатта ҡыҙыҡлы ваҡиғалар тураһында яҙмалар көтөп ҡалабыҙ.

Мөхәрририәт.