Боҙбармаҡтарҙан һаҡ бул

Райондың граждандар оборонаһы һәм ғәҙәттән тыш хәлдәр буйынса белгес А.И.Антипин хәбәр итеүенсә, һуңғы көндәрҙә һауа торошоноң тотороҡһоҙ булыуы: һепертмә буран, көндөҙ температураның нуль градустан юғары, ә төндә уның түбәнәйеүе сәбәпле, ҡыйыҡ баштарында боҙбармаҡтар һәм ҡар һырынтылары барлыҡҡа килә.

Ошоларҙы иҫәпкә алып, райондың ойошма, предприятие һәм учреждение етәкселәренә ҡыйыҡты ҡарҙан һәм боҙбармаҡтарҙан таҙартыу буйынса яуаплы хеҙмәткәрҙәр тәғәйенләү; административ, социаль объекттарҙың һәм торлаҡ фондындағы ҡыйыҡтарҙа тикшереү ойоштороу, хәүеф тыуҙырған осраҡта уны ваҡытында таҙартыу кәңәш ителә. Бер рәттән тормош хәүефһеҙлеге нигеҙҙәре буйынса уҡытыусыларға, класс етәкселәренә, балалар баҡсаһы тәрбиәселәренә мәғариф учреждениеларында инструктаждар үткәреү бурысы ҡуйылды.

Альберт Рәхимов.