Өфөлә күренекле башҡорт композиторы Нариман Сабитовҡа бюст асыла

2020 йылдың 11 ғинуарында Нариман Сабитовтың тыуыуына 95 йыл тулды (1925 – 1971). Юбилей саралары барышында 24 ғинуарҙа киске 5-се яртыла Башҡортостандың халыҡ рәссамы Зилфәт Басиров эшләгән бюсты асыу тантанаһы уҙа.

«Мәктәбебеҙ өсөн юбилей йылының ошондай мөһим һәм әһәмиәтле ваҡиға менән башланыуына бик шатбыҙ», — тип билдәләнеләр музыка мәктәбендә.

Өфөлә беренсе дәүләт музыка мәктәбе 1920 йылда В.И. Шиманскаяның һәм М.И. Андржеевскаяның билдәле шәхси музыка мәктәптәрендә асылған. 1971 йылда мәктәпкә композитор һәм дирижёр, БАССР-ҙың атҡаҙанған сәнғәт эшмәкәре, Салауат Юлаев исемендәге дәүләт премияһы һәм Ғәлимов Сәләм исемендәге премия лауреаты Нариман Сабитовтың исеме бирелгән.