Яңы йылға әҙерлек

Яңы йылға һанаулы ғына көндәр ҡалды. Һәр кем был мөғжизәле мәлде түҙемһеҙләнеп көтә. Байрамды күтәренке кәйефтә ҡаршы алыу йәһәтенән республикала 10 декабргә тиклем бөтә район-ҡалаларҙа ла яңы йыл майҙансыҡтары төҙөлөп бөтөргә тигән маҡсат ҡуйылды. Торлаҡ-коммуналь хужалыҡ министры Борис Беляев Хөкүмәт кәңәшмәһендә шулай тип белдерҙе. Республика буйынса 1 мең 99 боҙ ҡаласығы барлыҡҡа киләсәк. Был былтырғыға ҡарағанда, 11 процентҡа күберәк.

Ошо көндәрҙә район хакимиәте эргәһендәге майҙанда яңы йылдың төп символы – шыршы ҡуйылды. Әлеге мәлдә райондың ойошма һәм предприятие хеҙмәткәре тарафынан боҙ ҡаласығы төҙөлә. Бер рәттән, халыҡты “мөғжизә илендә” Ҡыш Бабай, Ҡарһылыу, төрлө әкиәт персонаждары, балалар һәм ололар өсөн тауҙан шыуыу урындары ҡаршы аласаҡ.