Бөтәһе лә Еңеү өсөн! Ветерандың вариҫтары алғы һыҙыҡта

Бәширов Зиннәт башҡа ир-егеттәр менән фронтҡа китә. Курск дуғаһын алыуҙа, Ленинград ҡалаһын азат итеүҙә, совет-герман, унан 3-сө Белоруссия фронтында ҡатнаша. Минск, Вильнюс, Каунас, Кибартай ҡалаларын азат итеүҙә, Кенигсберг ҡалаһын алыуҙа ҙур өлөш индерә. Бына көтөп алған еңеү!  Һалдаттар шатланып ҡайтырға сығалар. Тик бөтә эшелон менән бер ерҙә туҡтамай уларҙы тағы Японияға ҡаршы һуғышҡа алып китәләр. Ике ай  квантон армияһына ҡаршы һуғышып,  аяғы яраланып госпиталдә  даулана.  Зиннәт Әхмәтша улы  I һәм II дәрәжә Ватан һуғышы ордендары, Германияны,  Японияны еңгән өсөн миҙалдары, Жуков миҙалы, Ленинград алышы өсөн почёт билдәһе менән наградланған. Бөйөк Ватан һуғышы тамамланғас,  сиҙәм ерҙәрен күтәреүҙәге тырышлығы өсөн махсус миҙал  менән бүләкләнгән. Бәшировтар нәҫелендә патриотик тойғо   аяуһыҙ  һәм дәһшәтле йылдарҙың бөтә михнәттәрен үҙ башынан кисергән  ветеран олаталары  Зиннәт  һәм уның ағаһы Сафиулла Бәшировтарҙан килә. Максим Горький ауылынан Рәмилә һәм Зиннур Бәшировтарҙың  улдары ата-бабаларының рухына тап төшөрмәй  бөгөн   ил һағында тора. Кем генә уйлаһын, йылдар үтеү менән  яугирҙең ейәндәре   махсус хәрби операцияла неонацизмға ҡаршы яуға күтәрелер тип.   Зиннәт Бәшировтың  дүрт  ейәне — Айнур, Азат һәм  Илнар — Алкинола хәрби хеҙмәт юлындағы  илһөйәрҙәр, тәүге көндән үк яу яланында, мәктәптә  эшләгән  Нур ҙа  2023 йылда  контракт төҙөй. Батыр һәм эшһөйәр  яугир олатайҙың    ҡаһарманлығын  хәҙерге көндә  ейәндәре —  Айнур, Нур, Азат, Илнар  дауам итә. Ветерандың  вариҫтары  алғы һыҙыҡта: Тыуған илебеҙҙең тыныс тормошо һәм яҡты киләсәге  өсөн хәрби  бурыстарын намыҫлы үтәй. Уларҙың һәр береһенең күкрәк билдәләре, орден-миҙалдары ошо хаҡта һөйләй.