Тәбиғи ҡаза килһә, нимә эшләргә?

Редакцияға ошондай һорау менән мөрәжәғәт итеүселәр бар. Һуңғы йылдарҙа һауа торошо ҡырҡа үҙгәрҙе. Көтмәгәндә көслө ел-дауыл (ураган, ҡоторма) сығып китә. Быйыл ғына республикала күп кенә тораҡ пункттарҙа ағастарҙы ҡолатты, ҡоймаларҙы емерҙе, йорттарға һәм башҡа мөлкәткә зыян килтерҙе. Бәлә күргән осраҡта ҡайҙа мөрәжәғәт итергә, ниндәй ярҙам көтөргә? Район хакимиәте башлығының ауыл хужалығы, ер һәм мөлкәт һорауҙары буйынса урынбаҫары Азамат Нарбутин аңлатма бирә:

– Беренсе аҙым. Ҡот осҡос хәл булған осраҡта 112 телефонына, йәки туранан-тура район хакимиәтенең Берҙәм дежур-диспетчер хеҙмәтенә (ЕДДС) мөрәжәғәт итегеҙ.

Икенсе аҙым. Берҙәм дежур-диспетчер хеҙмәтенә яҙма ғариза тапшырығыҙ. Унда зыяндың төрөн, ҡайҙа, ҡасан булыуын ентекле күрһәтегеҙ, мотлаҡ фотоһүрәттәрҙе ҡушып һалығыҙ. Ғаризағыҙ теркәлгәс, зыянды баһалау өсөн махсус комиссия тәғәйенләнәсәк.

Өсөнсө аҙым. Әгәр ағас йәки ботаҡ күп йорт эргәһендәге биләмәлә ҡолап, автомобилегеҙгә йәки башҡа мөлкәтегеҙгә зыян килтерһә, идара компанияһына дәғүә белдерергә хоҡуғығыҙ бар. Был осраҡта Рәсәй ҡулланыусылар күҙәтеүе ярҙамы менән суд аша компенсация алыу мөмкин.

Дүртенсе аҙым. Ауыл хужалығы культураларына йәки умарталыҡҡа зыян килһә, Рәсәй ауыл хужалығы күҙәтеүенә мөрәжәғәт итегеҙ.

Барлыҡ документтарҙы, фото һәм видео материалдарҙы мотлаҡ һаҡлағыҙ — улар судта төп дәлил буласаҡ.
Электр уты һүнгән, юлдар тыйылған осраҡта ла Берҙәм дежур-диспетчер хеҙмәтенә хәбәр итегеҙ.

Әлиә Әмирова.

Автор:Мухаметьянова А.

Читайте нас

Редакция һайлауы