Ер-һыуыбыҙ – ҙур байлығыбыҙ Уны һаҡлау – изге бурысыбыҙ

Йәй — беҙҙең өсөн ял, сәйәхәт, урман-яланға сығыу ваҡыты. Уның ҡосағына һырыныу, йылға буйында ултырып сәй эсеү, күңел асыу — оло бәхет. Ләкин был шатлыҡ күп осраҡта бер яҡлы ғына. Тәбиғәтебеҙ кинәнесле мәл бүләк итһә, беҙ, кешеләр, күп осраҡта мәрхәмәтһеҙлек күрһәтәбеҙ, рәхмәт урынына сүп-сар ҡалдырып, бысратып китәбеҙ. Был — үҙ йөҙөбөҙгә ҡара төшөрөү генә түгел, тәбиғәткә ҡаршы енәйәт ҡылыу.

Ҡый-һай бәреп киткәндә, әй, «берәйһе йыйыр әле» тип уйлайбыҙ. Бер тапҡыр артыбыҙҙан йыймағанда әллә нәмә булмаҫ әле, тип ышанабыҙ. Әммә ошо “бер тапҡырҙар” йылдан-йыл ҡабатлана, тирә-яҡ ҡалдыҡтар менән тула. Уның һәр береһе быуаттар буйына һаҡлана, ҡот осҡос зыян килтерә. Айырым туҡталып китәйек:

Быяла янғын сығарырға һәләтле. Шулай уҡ, унда төрлө бөжәктәр, йыландар йәшеренергә ярата, ә хайуандар уға ҡағылып йәрәхәтләнә. Балыҡтар өсөн ярсыҡтар үлемесле.
Тимер (консерва банкалары, ҡалай һауыттар) — тутығып, тупраҡҡа ағыулы матдәләр бүлеп сығара. Көтөүгә сыҡҡан мал-тыуар, ҡырағай йәнлектәр, ҡоштар ҙа уның үткер ҡырына баҫып, йәрәхәт алырға мөмкин.
Пластик — иң яуыз ҡалдыҡ. Уға серер өсөн 100 йылдан ашыу ваҡыт кәрәк. Тупраҡты, һыуҙы бысрата, ваҡ киҫәктәре аҙыҡҡа әйләнеп, хайуандарҙың эсәк-ҡарынына эләгә.

Йәшәгән урындарыбыҙҙа таҙалыҡты талап итәбеҙ, әммә тәбиғәттең именлеге өсөн борсолмайбыҙ.

Кешелеклелек Кесе Ватаныбыҙға мөхәббәттән, хәстәрлек күрһәтеүҙән башлана. Үҙеңдән һуң ғына түгел, башҡаларҙың да сүп-сарын йыйып алырға көс табырға кәрәк. Йәш быуын был ғәҙәтте күреп, өлгө алып үҫергә тейеш. Тәбиғәт — беҙҙең өйөбөҙ. Әйҙәгеҙ, тыуған яғыбыҙҙы, урмандарыбыҙҙы, йылғаларыбыҙҙы таҙа тотайыҡ. Беҙҙең киләсәк быға ныҡ бәйле. Таҙа тәбиғәт — беҙҙең милли байлығыбыҙ, уны һаҡлау — һәр беребеҙҙең изге бурысы.

Әлиә Булатова.

Автор фотһы.

Автор:Мухаметьянова А.

Читайте нас

Редакция һайлауы