Үҙ теләге менән эштән бушатыу: һорауҙар һәм яуаптар

Дәүләт хеҙмәт инспекцияһының “ҡыҙыу линияһы”на көн һайын тиерлек эштән бушатыуға ҡағылышлы һорауҙар килә. Ул ябай ғына булып күренә: үҙ теләге менән эштән китеү тураһында ғариза яҙыла, ике аҙнанан килешеү өҙөлә. Әммә ысынында йыш ҡына күңелһеҙ хәлдәргә барып етә. БР Дәүләт хеҙмәт инспекцияһы етәксеһе урынбаҫары Оксана Ванскова аңлата.

—  Хеҙмәткәр инициативаһы буйынса хеҙмәт килешеүен өҙөү тәртибе РФ Хеҙмәт кодексының 80-се статьяһында яҙылған. Үҙ теләге менән эштән китеү өсөн хеҙмәткәргә был турала ғариза яҙыу ҙа етә.

Быны “һайланған” датаға тиклем ике аҙнанан да кәм булмаған ваҡыт эсендә эшләү зарур.  Күптәр быны “отработка” тип атай, әммә һүҙ эш биреүсене үҙ ҡарарың тураһында иҫкәртеү ваҡыты тураһында ғына бара. Шуға күрә был осорҙа хеҙмәткәрҙең дауаханала ятыуы йәки отпускыла булыуы мөһим түгел, мөҙҙәт барыбер үтәсәк. Ул эш биреүсегә алмаш эҙләү өсөн генә түгел, ә хеҙмәткәргә лә кәрәк. Тәжрибә күрһәтеүенсә, ошо ике аҙна эсендә хеҙмәткәрҙең ғаризаны кире алырға хоҡуғы бар. Уны урынына икенсе ойошманан күсереү тәртибендә башҡа хеҙмәткәр саҡырылған осраҡта ғына ҡабул итмәйәсәктәр.

“Ҡыҙыу линия” телефоны аша беҙҙән эш биреүсе “башта алмаш хеҙмәткәр табырға кәрәк”, “яңы килгән кеше өйрәнгәнсе”, “был айҙа эштән бушатыуға лимит бөттө” тип, ғаризаны ҡабул итмәһә, нимә эшләргә кәрәклекте аңлатыуҙы ла һорайҙар. Әлбиттә, был законға ҡаршы — бер кем дә һәм бер ниндәй ҙә сәбәптәр арҡаһында хеҙмәт килешеүен өҙөргә теләүсене тотоп ҡалырға хоҡуҡлы түгел.

Шулай итеп, әгәр эш биреүсе эштән китеү тураһындағы ғаризаны ҡабул итеүҙән баш тартһа, уны етәксегә заказ хаты менән ебәрергә йәки курьер хеҙмәтенә мөрәжәғәт итергә, йәғни эш биреүсегә ғариза килеүен теркәгән элемтә сараларынан файҙаланырға мөмкин. Ошо ваҡыттан алып ике аҙна иҫәпләнә һәм эштән бушатыу тураһында бойороҡ талап итергә була. Практика күрһәтеүенсә, үҙ теләге менән эштән бушатыу өсөн бер нәмә лә ҡамасауламай: ваҡытлыса эшкә яраҡһыҙлыҡ, отпуск, хеҙмәткәргә ҡарата ниндәй ҙә булһа матди дәғүәләр (уларҙы хеҙмәт килешеүе суд тәртибендә өҙөлгәндән һуң хәл итергә мөмкин).

 Тағы бер киң таралған һорау: ҡайһы осраҡта хеҙмәт килешеүен өҙөү өсөн ике аҙна көтмәҫкә мөмкин? Әлбиттә, һүҙ эш биреүсе хеҙмәткәрҙе икенсе көндө үк бер ниндәй ҡаршылыҡһыҙ эштән бушатырға риза булған хәл тураһында бармай. Хеҙмәт кодексында бындай осраҡтарға пенсияға сығыу, белем биреү учреждениеһына уҡырға  инеү һәм башҡалар индерелә (йәғни исемлек асыҡ, әммә был ике нигеҙ генә күрһәтелһә, эш биреүселәр уларҙы киңәйтеүгә һирәк бара, шуға күрә, китергә ҡарар итеп, хәбәр итеү өсөн тейешле ваҡытты ҡарау яҡшыраҡ һәм еңелерәк). Граждан китергә теләй икән, уға өс көн эсендә эш биреүсегә яҙма рәүештә хәбәр итеү ҙә етә.

БР Дәүләт хеҙмәт инспекцияһы.

Фото Nano Banana  нейроселтәре ярҙамында эшләнде.