Бер өлөшө ипләнде

Төбәк программаһы 2022 йылда Радий Хәбиров башланғысы менән эшләй башланы. Республика Башлығы финанслауҙы йыл һайын миллиард һумға арттырырға ҡушты.

Бөгөн Арх-Латыш ауыл биләмәһе халҡын иң борсоған һорауҙарҙың береһе — район үҙәгенә тиклемге юл. Ул  инде утыҙ йылға яҡын яҡшы ремонт күргәне юҡ. Етмәһә, “Архангел — Максим Горький” юл участкаһының туҡталыштан элекке асфальт-битум заводына тиклемге  өлөшө — сүп өҫтөнә  сүмәлә. Ике саҡрымдай аралағы соҡор-саҡырҙарҙың иҫәбе юҡ. Әйткәндәй, Башҡортостан Республикаһының Транспорт һәм юл хужалығы министрлығы вәкилдәре юлдың был өлөшө 2025 йылда төҙөкләндереләсәк, тип вәғәҙәләгәйне.

Яҡшы хәбәрҙәрҙән — ниһайәт, Горный ауылы янындағы оло юлдың бер бәләкәй өлөшөнә асфальт түшәлде.  Хәҙер бер саҡрымды тип-тигеҙ юлдан шыжлатып ҡына елдереп үтергә була. Артабан ҡәҙимгеһе башлана.  Максим Горький ауылына ингәнсе соҡорҙарҙар ҙа ямалды.

 Шайтан ғына өмөтһөҙ, тиҙәр. Юлдарыбыҙ киләсәктә ипләнер. Көтәйек әле.

Дилара Бәҙретдинова.  

И.Бәҙретдинова фотоһы.