Мөғжизәләр тыуҙырған оҫтахана

2024 йылдың 1 ноябренән район үҙәгендә коррекция-үҫеш эше бүлеге базаһында инклюзив көршәксе оҫтаханаһы проекты үҙ эшмәкәрлеген башланы. Уны тормошҡа ашырыу сиктәрендә педагогтар даими рәүештә күсмә оҫталыҡ дәрестәре ойоштора. Сираттағы ошондай осрашыу Абҙан мәктәбе уҡыусылары өсөн уҙғарылды.

Балалар башта көршәкселектең барлыҡҡа килеү тарихы менән танышты, ҡулланылған материалдар һәм ҡоралдар тураһында белде. Һуңынан ижади эшмәкәрлек мөхитенә сумды — балсыҡтан бесәй әүәләп ҡараны, уның барышында һындар, башҡа нәмәләрҙе ҡайһылай эшләү тураһында һорашты.

Бындай саралар мәҙәниәтте һаҡлау, уҡыусыларҙа төрлө биҙәү-ҡулланма сәнғәте төрҙәре менән шөғөлләнеүгә ҡыҙыҡһыныу тәрбиәләү өсөн тәғәйенләнгән.

Проект “Изгелек ҡылыусылар” хәйриә фонды менән берлектә Башҡортостан Республикаһы Башлығы гранттары фонды ярҙамында Башҡортостан Республикаһы Башлығы гранты иҫәбенә тормошҡа ашырыла.

Теләгән һәр баланы үҙебеҙҙең оҫтаханала көтәбеҙ.

Зөлфиә Ардашева,

проект етәксеһе, “Ғаилә” район-ара хеҙмәте методисы.

Автор фотоһы.