“Табын иле – Илһам иле”

Хөрмәтле гәзит уҡыусылар, ҡәләм тирбәтеүселәр, һеҙҙең иғтибарға Т.Килмөхәмәтов исемендәге “Табын иле – Илһам иле” әҙәби бәйгенең шартнамәһен тәҡдим итәбеҙ.

Әҙәби бәйге Бөйөк Еңеүҙең 80 йыллығына һәм Ватанды һаҡлаусылар йылына арнап үткәрелә. Ижад бәйгеһенең төп маҡсаты һәм бурыстары:  боронғо Табын ырыуҙары ерендә урынлашҡан Архангел, Ғафури, Ҡырмыҫҡалы, Учалы райондарында йәшәгән һәләтле кешеләрҙе асыҡлау һәм уларға ижади үҫештә ярҙам итеү, эштәрен халыҡҡа еткереү;  конкурста ҡатнашыусыларҙың данлы тарихыбыҙҙың бөйөклөгө, яугирҙәребеҙҙең ҡаһарманлығы сағылыш тапҡан әҫәрҙәре аша йәш быунда илһөйәрлек һәм телһөйәрлек сифаттарын тәрбиәләү;  Табын ырыуҙарының батырҙарына мәдхиә йырлау, тыуған төйәккә ихтирам уятыу, тарихты өйрәнеү кеүек ынтылыштарҙы пропагандалау.

Әҙәби-ижад бәйгеһен ойоштороусылар: “Табын ырыуҙары берләшмәһе” йәмәғәт ойошмаһы советы, урындағы бүлексәләр, “Даирә”, “Инйәр”, “Табын”, “Яйыҡ” гәзиттәре мөхәрриәттәре.

Конкурста ҡатнашыусылар ике төркөмгә бүленә: 1-се төркөм: мәктәб уҡыусылары, урта һәм юғары уҡыу йорттары студенттары;  2-се төркөм: өлкән йәштәге әҙәби ижад менән шөғөлләнеүселәр.

Ижад бәйгеһе ике  номинацияла үткәрелә: поэзия (шиғыр, ҡобайыр, поэма һәм башҡалар); проза (хикәйә, эссе, әкиәт һәм башҡалар)

Һәр кем быға тиклем бер ҡайҙа ла баҫылмаған өр-яңы эштәрен “Инйәр” гәзите редакцияһына 2025 йылдың 1 февраленән 1 ноябренә тиклем “Конкурсҡа” тигән тамға ҡуйып, ебәрә ала.

Иҫкәртмә: ижади эштәр А 4 форматында (14-се шрифт) 5 биттән артмаҫҡа тейеш.

 Бәйгелә ҡатнашыусы үҙе хаҡында ҡыҫҡаса мәғлүмәт ебәрә (исем-шәрифе, әҙәби ҡушаматы, йәшәгән урыны, әҙәби ижад менән нисә йыл шөғөлләнә, әҫәрҙәре ҡайҙа баҫылған, телефоны, электрон почтаһы) һәм фотоһүрәтен.

  Иҫкәртмә: Яҙыусылар союзы ағзалары бәйгелә конкурстан тыш ҡатнаша ала.

Еңеүселәрҙе билдәләү һәм бүләкләү

Беренсе турға килғән эштәр район гәзиттәрендә баҫыла. Финалға үткән эштәр “Табын иле – Илһам иле” тип аталған йыйынтыҡта донъя күрәсәк. Конкурста еңеүселәр (3 урын) дипломдар, китаптар, бүтән ҡатнашыусылар Рәхмәт хаттары менән буләкләнә. Конкурс еңеүселәрен һәм ҡатнашыусыларҙы тәбрикләү тантанаһы Ғафури районында ойошторола.

Мөхәрририәт.