Ат бәйгелә һынала

Тирәкле ауылында йәшәүсе Салауат Юлай улы Шайхинды райондаштарыбыҙ йылҡысы, ат сабыштарында еңеүсе, тип белә. Салауат Юлай улы үҙе тәрбиәләп үҫтергән малҡайҙары менән алты йыл рәттән төрлө бәйгеләрҙә ҡатнашып килә. Һуңғы өс йылда уның “Намаҙ” ҡушаматлы айғыры “Аҡбуҙат” ипподромында  уңышлы сығыш яһап, районыбыҙ исемен данланы.

“Намаҙ”ға — ете йәш. Был айғыр малының иң көслө сағы. Республика кимәлендәге ярыштарға тиклем ул район һабантуйҙарында, район-ара ат-спорт уйындарында — еңеүсе. Ҡәҙимге тормошта — ул йылҡы өйөрө айғыры.

2024 йылда С.Шайхин “Намаҙ” менән барлығы 11 республика бәйгеләрендә етеҙлектә көс һынашып, шуларҙың һигеҙендә 1-се урындарҙы яулаһа, бер ярышта 3-сө һәм ике сабышта 2-се урындарҙы алған.  

— “Намаҙ” менән Башҡортостан буйлап күп йөрөнөк. Саф башҡорт тоҡомло аҡыллы, түҙемле мал ул.

Яңыраҡ  Өфөлә “Аҡбуҙат” ипподромының “Башҡорт аты” залында үткән йыл йомғаҡтары буйынса түңәрәк өҫтәл ойошторолдо. Унда мин дә  саҡырылдым. Ошо сарала 2024 йыл таҙа ҡанлы башҡорт тоҡомло ат сабыштары миҙгелендә иң күп еңеүҙәр яулаған  өсөн “Башҡорт даны” номинацияһында еңеүсе Дипломы менән бүләкләнеләр.  Һөҙөмтәлә “Намаҙ” “Башҡорт аты” статусына эйә булды, — тип шатлығы менән уртаҡлашты Салауат Юлай улы.

Дилара Бәҙретдинова.

С.Шайхин тарафынан ебәрелгән фото.