Ҡаһарманлыҡ, илһөйәрлек өлгөһө

“Еңеү йырҙары” фестиваль-конкурсы музыкаль сара ғына түгел, ә яугирҙәр иҫтәлегенә арналған һәм илһөйәрлек рухын һәм Ватанға һөйөүҙе данлаған иҫтәлекле ваҡиға ла.

Район мәҙәниәт йортонда 1-се Архангел мәктәбе коллективы Бөйөк Еңеүҙең 80 йыллығына арналған “Еңеү йырҙары” патриотик йырҙар бәйгеһе сиктәрендә махсус хәрби операция зонаһында хәрби бурысын үтәгәндә һәләк булған Алмас Әсҡәт улы Хужиндың иҫтәлегенә концерт программаһы менән сығыш яһаны.

1-се Архангел мәктәбе директоры Любовь Курунова тамашасыларҙы һәм жюри ағзаларын тәбрикләп, яҡшы кәйеф, ә бәйгеселәргә уңыш теләне. Концерт ойошҡанлығы менән айырылып торҙо.  Барыһы ла ентекле әҙерләнгән, йөрәккә үтеп инерлек йырҙар һайланған. 7-се “А” класы башҡарыуындағы “Ә таңдар бында алһыу” бейеүе һәм “Батырҙар йыры”, уҡытыусыларҙың хәрби йырҙарҙан пупурри, 8-се “Б” класы уҡыусыларының “Терелгән фотоһүрәттәр” сәхнәләштерелгән әҫәре, Ленара Миһранова менән Туҡаев Алмаздың “Һау бул, әсәй!” һәм башҡа йырҙар көслө алҡыштар менән оҙатылды.   Әйткәндәй, тамашасылар залының тулы булыуы  ҡыуандырҙы.

— “Еңеү йырҙары” район фестиваль-конкурсының йомғаҡтары май айында байрам гало-концертында иғлан ителәсәк, — тине район мәҙәниәт бүлегенең мәғлүмәт-методик бүлеге етәксеһе Розалия Хәсәнова.

Д.Бәҙретдинова.  

Автор фотоһы.