“Тыуған көндәр бер көндә”

Фирҙәүесә Фәһим ҡыҙы Ғәзизова (Шәрәфетдинова)  Ҡырмыҫҡалы районы Ҡабаҡ ауылында тыуа. Йәш ярым булғанда инәһе үлеп киткәс, уны районыбыҙҙың Ҡыҙылъяр ауылында йәшәгән өләсәһе менән олотаһы (инәһенең ата-әсәләре) Фәриҙә Хәмәтғәли ҡыҙы һәм Мостафа Юламан улы Шәриповтар тәрбиәләй. Башта Ҡыҙылъярҙа башланғыс белем алһа, артабан Абҙан урта мәктәбендә, 1993-1997 йылдарҙа Өфөнөң беренсе педагогия колледжында уҡый. 2012 йылда ситтән тороп БДУ-ның  башҡорт филологияһы һәм журналистика факультетын, 2016 йылда магистратураны тамамлай. 2018 йылдан  бөгөнгәсә Башҡортостан Республикаһы Өфө ҡалаһы ҡала округының “Фәнни-мәғлүмәти-методик үҙәк” өҫтәмә белем биреү муниципаль бюджет мәғариф учреждениеһының туған телдәр буйынса методисы булып эшләй.

Фирҙәүесә Ғәзизованың өйө тулы гәзит-журналдар. Матбуғатҡа яҙылыуҙан бер ваҡытта ла ситтә ҡалмай.

— “Инйәр” гәзите менән иҫ белгәндән танышмын. Ул элек “Ильич байрағы”, “Архангел хәбәрҙәре” исеме аҫтында сыға ине. Өләсәйем менән олатайым уны һәм башҡа баҫмаларҙы гел алдырып торҙо.

Электән гәзиттә оҡшаған рубрика — тыуған көндәр менән ҡотлауҙар. Таныш кешеңдең нисәһендә тыуған көнө һәм нисә йәш тулыуын белеү ҡыҙыҡ тойола ине. Тағы ла,  фермала һөт йыйыу таблицаһы хәтеремдә. Ундағы плюс-минустарҙы ул ваҡытта кем аңлаһын инде. Ҡыҙылъяр фермаһы беренселәр рәтендә килгәс, урынын күҙәтеп бара торғайным. Әлбиттә, мин белгән кешеләр тураһында мәҡәлә сыҡһа, шул гәзитте һаҡларға күнеккәйнем. 

Әлеге көндә “Инйәр” гәзитенең электрон вариантын алдырам. Уның биттәре төҫлө, бигерәк уңайлы төр. Шулай уҡ, гәзит килеү менән, иң беренсе ҡотлауҙар рубрикаһынан башлайым. Ҡыҙылъярым, тормош иптәшемдең ауылы — Оҙондар,  мәктәптәребеҙ, ауылдаштарыбыҙ тураһында һәм районда ниндәй саралар үткәне, яңылыҡтар хаҡында хәбәрҙарбыҙ. Элегерәк иҫебеҙ китеп, ышанып йондоҙнамәне көтөп алһаҡ, хәҙер инде уны рәхәтләнеп көлөп уҡыйбыҙ. Һынамыштар, байрамдар, райондаштарымдың шиғырҙары, хикәйәләр менән танышып барам.

“Инйәр”ҙең юбилейы уңайынан “Тыуған көндәр бер көндә” рубрикаһы тураһында белгәс, тыуған көнөм 3 май булһа ла яратҡан гәзитемә үҙем хаҡында яҙырға батырсылыҡ иттем әле, — ти “Инйәр” гәзитенең тоғро уҡыусыһы, яҡташыбыҙ Фирҙәүесә Фәһим ҡыҙы.

Дилара Янбаева.

Фото — ғаилә архивынан.