Ҡөрьән өйрәнеү — ҙур сауап

Ҡырмыҫҡалы районы Ҡарлыман ауылының “Нурғәли” мәсетендә  имам-хатиб Әлфәрит хәҙрәт Ширғазин  һәм Марат хәҙрәт  Бүләков башланғысы менән “Хәфиз-Ҡөрьән” Ҡөръән сүрәләрен яттан уҡыу буйынса балалар араһында конкурс ойошторолдо. Уның шарты буйынса бәйгеселәр Ҡөръәндең 10  сүрәһен яттан һөйләргә, Ҡөрьән сүрәһен тәжүид уҡырға, һорауҙарға яуап бирергә һәм яратҡан шағирҙарының шиғырын тәҡдим итергә тейештәр ине.

Районыбыҙҙан был һынауҙа Максим Горький ауылынан Абдуллин Роберт ҡатнашты. Роберт Рәйсә Йәғәфәр ҡыҙы менән Булат Ишбулды улы Йәнешевтәрҙең ғаиләһендә тәрбиәләнә. Ул “Сулпан” мәсетенә даими йөрөй. Иң алдынғы шәкерттәребеҙҙең береһе. Башҡаларға дини белемдәрен теләп өйрәтә.

Роберт Ҡөръән-Кәримдең 10  сүрәһен яттан һөйләү һәм  Ҡөрьән сүрәһен тәжүид уҡыу номинацияларында  1-се урындарҙы яуланы. Райондашыбыҙҙың уңышына бик шатбыҙ. Ойоштороусылар еңеүселәргә Маҡтау ҡағыҙҙары, аҡсалата премия һәм тәмлекәстәр бүләк итте. Бындай конкурстар “Нурғәли” мәсетендә өс айға бер тапҡыр уҙғарыла икән.

Беҙҙә лә оҡшаш саралар ойошторолоп торһа бик яҡшы булыр ине. Әйткәндәй, Максим Горький ауылындағы “Сулпан” мәсетендә һәр шәмбе дини дәрестәр үткәрелә. Уға теләгән һәр кем килә ала.  

Дини бәйгеләр балаларыбыҙҙың рухи үҫеше өсөн ҙур әһәмиәткә эйә. Был үҙ белемен һәм оҫталығын һынап ҡарау мөмкинлеге генә түгел, ә Ҡөрьәнде өйрәнеүгә, йолаларға хөрмәт тәрбиәләүгә һәм әхлаҡи ҡиммәттәрҙе формалаштырыуға этәргес тә. Улар йәмғиәтебеҙҙе нығыта һәм киләсәк быуындарға аҫыл мираҫ тапшыра.

Гөлгөнә Хисмәтуллина,

Максим Горький ауылының “Ағинәйҙәр” ойошмаһы етәксеһе.

Автор фотоһы.