Аҡыллылар, тапҡырҙар, етеҙҙәр, илһамлылар

Үткән аҙна район мәҙәниәт йортонда Өфө-Көньяҡ зонаһына ингән: Архангел, Благовар, Бүздәк, Дәүләкән, Ҡырмыҫҡалы һәм Шишмә райондарының һәләтле балаларын берләштергән “Йыл уҡыусыһы — 2024” Бөтә Рәсәй конкурсының зона этабы үтте.

Ярышта төрлө өлкәләрҙәге ҡаҙаныштарын күрһәтергә әҙер булған йәш аҡылдар һәм сәмлеләр тупланды. Үҫмерҙәр проекттарын бер нисә йүнәлештә тәҡдим итте: “Уҡыусылар советы рәйесе”, “Йыл йәмәғәтсеһе”, “Йыл ирекмәне”, “Ижади шәхес”, “Йыл спортсыһы”, “Йыл аҡылы”, “Йыл илһөйәре”. Аудиторияларҙа номинацияларға ярашлы, махсус кейстарҙа эштәр таратылды.  Сара сиктәрендә ҡатнашыусылар үҙҙәрен таныштырып, эшмәкәрлектәре, шөғөлдәре, ҡаҙаныштары хаҡында һөйләне. Был ижадилыҡ, логика, тәнҡитле фекерләү һәм аҡыл  һәләте өсөн ысын һынауға әйләнде.

Бәйге үҙ эсенә төрлө этаптарҙы алды: проекттарҙы яҡлау, ижади конкурстарҙа ҡатнашыу, интеллектуаль ярыштар һәм дебаттар. Сарала сәләмәт көнәркәшлек һәм илһам мөхите хөкөм һөрҙө. Ҡатнашыусылар үҙҙәренең уңыштарын ғына түгел, яңы маҡсаттарға  ынтылышын да күрһәтеп, үҙ идеялары менән дәррәү уртаҡлашты. Һәр конкурсант сығыштарға ентекле әҙерләнгән.  Үҙенсәлекле презентациялар, сағыу проекттар һәм ышаныслы сығыштар — бөтәһенә лә ижадилыҡ һәм берҙәм фекер рухын тойорға мөмкинлек бирҙе. Иғтибарҙы айырыуса “Йыл йәмәғәтсеһе”  категорияһында ҡатнашыусылар йәлеп итте, улар үҙ райондарында тормошто яҡшыртыуға йүнәлтелгән бер нисә социаль башланғыс тәҡдим итте.

Интеллектуаль ярыштар киң белемлелекте генә түгел, ә ҡатмарлы хәлдәрҙә ғәҙәти булмаған ҡарарҙарҙы тиҙ табыу һәләтен дә асты. Тәжрибәле педагогтарҙан һәм йәмәғәт эшмәкәрҙәренән торған жюри  конкурсанттарҙың юғары әҙерлек кимәлен һәм  мөмкинлектәрен ғәҙел билдәләне. Йомғаҡтар буйынса еңеүселәр һайланды.

Районыбыҙ уҡыусылары был юлы ла  үҙҙәрен яҡшы күрһәтте. Юлыбаева Арина (Тирәкле мәктәбе)  — “Йыл илһөйәре”,  Мортазина Динара (2-се Архангел мәктәбе) — “Йыл йәмәғәтсеһе”, Ефимова Анастасия (1-се Архангел мәктәбе) —  “Ижади шәхес”, Хәсәнова Айлина (1-се Архангел мәктәбе) — “Йыл спортсыһы” номинацияларында 1-се урындарға  лайыҡ булды. Оҙондар мәктәбенән Шаһиева Гөлдәргә “Йыл спортсыһы” номинацияһында ҡатнашыусы сертификаты тапшырылды.

Еңеүселәр “Йыл уҡыусыһы” республика финалында сығыш яһаясаҡ. 

Дилара Фәтихова.

Автор фотоһы.