Мосафирҙар өсөн мәсет

 “Ҡурғаш” юл буйы кафеһы биләмәһендә модулле мәсет асылды. Был эш  билдәле “Юлсы” проектына (етәксеһе — Алмас Вәлиев) ярашлы тормошҡа ашырылды. Тантаналы сарала Башҡортостан мосолмандары Диниә назараты рәйесе Айнур Бирғәлин, район хакимиәте вәкилдәре, үҙебеҙҙең һәм Белорет районының имам-мөхтәсибтәре, урындағы әүҙемдәр, имамдар ҡатнашты.

 Модулле мәсет асыу — берҙәм хеҙмәт емеше. Баҡалды ауыл хакимиәте башлығы Урал Шаһиев уның алдына ҡырсынташ түктерҙе, районыбыҙҙың  имам-мөхтәсибе Фәнзил хәҙрәт Хисаметдинов һәм Абҙан, Тирәкле, Оҙондар, Ҡыҙғы ауылдарының имамдары  уны эргә-тирәгә түшәп, мәсеттең күтәрмәһен эшләп ҡуйҙы.

Фәнзил хәҙрәт Хисаметдинов  билдәләүенсә, Өфө-Инйәр-Белорет юлы аша күп кеше  йөрөй.

— Дин тотҡан мосафирҙар байтаҡ. Улар юл буйында шарттар булмағас, намаҙҙы төрлө урынға инеп уҡырға мәжбүр ине. Хәҙер, әл хәмдү лил-ләһ, тыныс ҡына ғибәҙәт ҡылырлыҡ бүлмә булдырылды, – тине.

Беҙҙәге модулле мәсет — республикалағы 11-се ғибәҙәт урыны. Уның эсенә иғәнә лә урынлаштырылған, кемдәр теләй хәйер-саҙаҡа һала ала. Мәсетте ҡарау, йыйыштырыуҙы “Ҡурғаш” кафеһының хужаһы Марсель Дамир улы үҙ өҫтөнә алды.

Дилара Бәҙретдинова.

Ә. Ноғаманова тарафынан ебәрелгән фото.