“Хәүефһеҙ газ”

Башланғыс класс уҡыусылары өсөн “Хәүефһеҙ газ — балаларға” тип аталған класс сәғәте, шулай уҡ һүрәттәр конкурсы ойошторолдо. Өлкәнерәктәр араһында “Хәүефһеҙлек ҡағиҙәләрен белһәң, газ ҡурҡыныс түгел”, “Әгәр һеҙ өйҙә газ еҫен һиҙеп ҡалһағыҙ” тигән асыҡ дәрестәр уҙҙы. Сара барышында балалар “зәңгәр яғыулыҡ” тураһында тулы мәғлүмәт алды, бәхетһеҙ осраҡҡа алып килгән бер нисә ваҡиғаны хәл итте, көнкүрештә газ менән ҡулланыу ҡағиҙәләре буйынса викторинала ҡатнашты. “Тәбиғи газ төрҙәре һәм уларҙы хәүефһеҙ ҡулланыу” исемле тематик дәрестә уҡыусылар газ төрҙәре менән танышты, дөйөм талаптарҙы бергәләп тикшерҙе, тест һорауҙарына яуап бирҙе. Дәрес һуңында “Хәүефһеҙ газ” тигән видеоролик ҡараны.

Бөгөн ошондай сараларҙы үткәреү бик урынлы, сөнки хәүефһеҙлек ҡағиҙәләрен теүәл үтәмәү, етди ҡарамау йыш ҡына күңелһеҙ хәлдәргә килтерә. Үҙеңдең һәм башҡаларҙың ғүмерен, һаулығын ҡурҡыныс аҫтына ҡуймаҫ өсөн газ һәм газ приборҙары менән дөрөҫ ҡулланыуҙы һәр саҡ иҫтә тоторға кәрәк.

63-сө янғын һүндереү часы хеҙмәткәрҙәре менән дә осрашыуҙар ойошторолдо. Улар ҙа уҡыусыларға файҙалы мәғлүмәттәр, урынлы кәңәштәр бирҙе, хәүефһеҙлек ҡағиҙәләрен етди үтәргә саҡырҙы.

Таңһылыу Исламғолова,

район мәғариф бүлегенең хеҙмәтте һаҡлау һәм янғын хәүефһеҙлеге ҡағиҙәләре һәм эксплуатациялау буйынса белгес.

Фото — асыҡ сығанаҡтарҙан.