Эшҡыуар булам тиһәң… Юлдар асыҡ

“Бәләкәй һәм урта эшҡыуарлыҡ һәм шәхси эшҡыуарлыҡ башланғыстарына булышлыҡ ҡылыу” милли проекты биш өлөштән – федераль проекттан – тора: “Эшҡыуарлыҡты алып барыу шарттарын яҡшыртыу”, “Бәләкәй һәм урта эшҡыуарлыҡ субъекттарын финанс ресурстарға, шул иҫәптән ташламалы финанслауға индереү юлдарын киңәйтеү”, “Бәләкәй һәм урта эшҡыуарлыҡ субъекттарын йылдам үҫтереү”, “Фермерҙарға ярҙам итеү системаһын булдырыу һәм ауыл кооперацияһын үҫтереү”, “Эшҡыуарлыҡты популярлаштырыу”. Был милли проектҡа ярашлы, Башҡортостанда төбәк проекттарының биш паспорты раҫланған.

Башҡортостан Республикаһы Башлығы Радий Хәбиров төбәктең һәр муниципалитетында аҙна һайын инвестиция сәғәттәрен үткәрергә тәҡдим иткәйне. Ошо юҫыҡта районда әүҙем эшмәкәрлек алып барыла. Кесаҙна һайын “Эшҡыуар сәғәте” ойошторолоп тора. Сираттағыһында Алексей Усманов ат спорты үҙәген төҙөү буйынса үҙ тәҡдимдәре менән сығыш яһаны. Уның сиктәрендә районда экотурзм йәүнәлешен үҫтереү, халыҡ араһында сәләмәт тормош рәүешен пропагандалау, хайуандарға ихтирам тойғоһон уятыу кеүек бурыстар тора.