Күңелһеҙ хәлдәр теркәлеп тора

Өфөлә, Стәрлетамаҡта һәм башҡа райондарҙа ағыуланыусылар күп булды. Белгестәр әйтеүенсә, был "кәнфит" зарарлы матдәләргә бик бай һәм тиҙ арала бәйлелек тыуҙыра. Снюс – дымға туйындырылған тәмәке, нигеҙҙә уны Швецияла, Норвегияла ҡулланалар. Уны тәмәке тартыуҙың имеш “хәүефһеҙерәк” алмашы булараҡ етештерәләр. 2015 йылдан тыйылған булһа ла, былтырҙан алып снюс йәнә популярлыҡ яуланы һәм яңы төр булып сығарыла башланы. Хәҙер шыйыҡ никотинлы кәнфит булараҡ һатыла. Элек уны тик махсуслаштырылған тәмәке кибеттәрендә генә табып булһа, бөгөн теләһә ниндәй аҙыҡ-түлек магазинынан һатып алырға мөмкин.

Башҡортостан Башлығы Радий Хәбиров снюсты һатыуҙы тыйыу тураһында ҡарар ҡабул итте. Әммә шуға ҡарамаҫтан, йәнә күңелһеҙ хәл теркәлгән, был юлы Әлшәй районында.

Башҡортостандың Тәфтиш комитетынан хәбәр итеүҙәренсә, баланы йәшәгән адресынан алып килгәндәр. Яҡынса фараздар буйынса, ул снюс менән ағыуланған, әммә уның ҡулына был ағыулы "кәнфит"тең нисек эләккәнлеге билдәһеҙ. Табиптар 11 йәшлек сабыйҙы ҡотҡарып ҡалған. Тәфтишселәр ошо осраҡ буйынса тикшереү үткәрә.