“Киләсәккә билет”

Эшҡыуарлыҡ эшмәкәрлегенә ҡыҙыҡһыныу уятыу маҡсатынан 2020 йылдың 10 октябренән 28 ноябренә тиклем 14-17 йәшлек уҡыусылар өсөн “Балалар Бизнес Академияһы” — “Уҡыусы-эшҡыуар” тип аталған проект тормошҡа ашырыла. Унда эшҡыуарлыҡ нигеҙе буйынса белем биреү курстарын уҙғарыу ҡаралған. Махсус дәрестәр YouTube “Уҡыусы-эшҡыуарҙар — 2020” каналында һәр шәмбе һайын онлайн режимда үткәреләсәк. Беҙҙең райондан был программала 13 белем биреү усағынан 50-нән артыҡ бала ҡатнаша.

Юл хәүефһеҙлеге ҡағиҙәләрен пропагандалау, балаларҙың юлда йәрәхәтләнеүе мәсьәләһенә йәмәғәттең иғтибарын йәлеп итеү, әүҙем граждандар позицияһын тәрбиәләү маҡсатынан районыбыҙҙың белем биреү учреждениелары “Юл хәрәкәте ҡағиҙәләре ритмында” республика челлендж-марафонында, “Юл хәрәкәте ҡағиҙәләренең каникулдары юҡ!”, “Йәйәүле, наушниктарыңды сис!”, “Бала саҡ хәүефһеҙлеге”, “Юл хәрәкәте ҡағиҙәләренә дөрөҫ йүнәлеш ал!” конкурстары һәм акцияларында, “Хәүефһеҙ тәгәрмәс” бәйгеһендә әүҙемлек күрһәтә. Беҙҙең тәрбиәләнеүселәребеҙҙең эштәре менән “Бәйләнештә” социаль селтәрендә “ЮИД Республики Башкортостан”, инстаграмда “ЮИД Башкортостан – АЛГА! (yuidbashkortostan)” биттәрендә танышырға мөмкин.

“Киләсәккә билет” Бөтә Рәсәй программаһы балаларға кәрәкле һөнәр һайлауҙа ярҙам итә. Ул “Мәғариф” милли проект сиктәрендә ойошторола. Беҙҙең райондан 6-11 кластарҙан 50-нән артыҡ уҡыусы 60-лап төрлө профориентация тесттары үтә. Быларҙан тыш, балалар һөнәри пробаларҙа ҡатнашып, үҙҙәрен тормошта һынап ҡарай ала.

Албина Сөләймәнова,

мәғариф бүлегенең тәрбиәүи эштәр буйынса методисы.