“Башҡортостан кешеләре” беҙҙә

“Башҡортостан кешеләре” проектының етәксеһе, РФ Дәүләт Думаһы депутаты, билдәле радио һәм телевидение алып барыусыһы Инга Йомашева ошо көндәрҙә эш сәфәре менән районыбыҙға юл тотто.

Осрашыу мәлендә яҡташыбыҙ эшҡыуарҙар ойошмаһының вәкилдәре Илмира Хибәтова, Тимерғәли Уразғолов һәм Андрей Алейников менән әңгәмәләште, урындағы иҡтисади үҫеш менән ҡыҙыҡһынды. Артабан Орловка ауылында уҙғарылған “Ҡул буҫтауы”, “Биҙәкләп һуғыу төрҙәре” республика семинарҙарына йыйылған һәләтле ҡул оҫталары менән танышты.

Проекттың етәксеһе Инга Йомашева:

— Мәскәүҙә эшләй генә башлаған сағымда үҙебеҙҙең яҡташтарыбыҙҙы берләштергән тере, йәнле ойошма кәрәк тигән уй тыуҙы. “Башҡортостан кешеләре” республикабыҙҙан ситтә йәшәгәндәрҙе бергә туплай. Беҙ бында фекерҙәр менән алышабыҙ, бер-беребеҙгә ярҙам итәбеҙ. Ғәмүмән, проекттың төп бурысы — яҡташтарыбыҙға файҙалы кәңәштәр биреү, өйрәтеү, тәжрибә менән уртаҡлашыу, терәк-таяныс булыу һәм әлбиттә, Башҡортостандың исемен күтәреү.

Дилара Бәҙретдинова.