Һыйырҙың һөтө — телендә

Убалар ауылында эшмәкәрлек иткән Урал Абдуллиндың хужалығы ла Максим Горький янындағы ҡуртымға алынған сабынлыҡ һәм болонлоҡтарҙа тәүлек әйләнәһендә бесән саба.

Ағымдағы аҙнаның бик эҫе тороуына ла сыныҡҡан ир-уҙамандарҙы бер ҙә ҡурҡытмай. Башҡалар һыу буйҙарында, күләгәлә ял иткәндә улар техника гөрләп торған яландарҙа тир түгә.

— Мал аҙығы кампанияһы өсөн иң уңайлы ваҡыт. Әле үләндең иң һутлы сағы, тап ошо мәлдә уны әҙерләп ҡуйырға кәрәк. Һыйырҙың һөтө — телендә, тигәндәй бөйрәкәйҙәрҙең сифатлы ҡышлауы бөгөн хәл ителә. Шуға күрә шәхси хужалыҡтар, КФХ-лар ҙа ҡояш ҡалҡып, ҡараңғы төшкәнсе бесәнлектәрҙә ҡайнай. Беҙ ҙә ҡуртымға алынған 167 гектарҙа оло эште тиҙерәк теүәлләп ҡуйырға тырышабыҙ.

Горный ауылынан Рәшитов Рәшит ярҙам итә. Ул “Т-40” тракторында сегментлы сапҡыс менән бесән саба, йыя. Тормош иптәшем Хәлиулла Абдуллин “МТЗ-920”-лә роторлы сапҡыс менән эш итә, “ТФР-145” прессподборщигы менән бесәндәрҙе төргәктәргә төрә. Яҡшы сифатлы бесән төргәктәрен көнөндә үк ҡайтарып ҡуйырға тырышабыҙ,-тип мал аҙығын әҙерләү кампанияһының барышы менән таныштырып үтте Раҡыя Фәзлиәхмәт ҡыҙы.

Дилара Бәҙретдинова.