Сәсеүҙән һуң —бесәнгә

күпселек хужалыҡтарҙа баҫыу эштәре теүәлләнә

Яҙғы сәсеү кампанияһы башланыу менән районыбыҙ хужалыҡтарының баҫыу-ҡырҙарында көнө-төнө агрегаттар гөрләй. Һәр КФХ, ауыл хужалығы предприятиелары мөһим бурысты тиҙ арала үтәргә тырышты. Ниһайәт, иген культураларын сәсеү эштәре ахырына яҡынлашты. Әйткәндәй, быйыл игенселәр өсөн һауа торошо ла тик ыңғай ғына булып торҙо, шуға күрә дым ҡаплау, бураҙналарға тос орлоҡтарҙы һалыу, ашлама индереү үҙ ваҡытында башҡарылды. Был иһә, яҡшы уңыш алыуҙың нигеҙе һанала.

1 июнгә ҡарата район буйынса барлығы 1798 гектар яҙғы бойҙай, 785 гектар арпа, 361 гектар майҙанда һоло, 576 гектар көнбағыш, 460 — рапс һәм 113 гектарҙа кукуруз сәселгән. Яҙғы һәм ужым культуралары яландарын ашлау, утау кеүек мөһим саралар үткәрелә. Сәсеү тамамланыу менән мал аҙығын әҙерләү башланасаҡ. Ағымдағы йылда ул план буйынса 60 мең тоннанан артыҡ тәшкил итә.

Дилара Бәҙретдинова.