Оло хөрмәткә лайыҡ

Бөйөк Ватан һуғышы ғәрәсәте һәр ғаиләгә ҡағылмай үтмәй. Кемдер атаһын, томош иптәшен, улдарын утлы тоҙаҡҡа оҙатҡан, күптәре кире әйләнеп ҡайтмаған.

Абҙан ауылында йәшәүсе өләсәйем Шәрифә Иҫәнғәле ҡыҙы Иманғалина тарихыбыҙҙың дәшһәтле йылдарын үҙ елкәһендә татығандарҙың береһе. Уның һуғыш тураһындағы хәтирәләре бер ваҡытта ла онотолмай. Өләсәйем 1924 йылдың 22 июлендә Ҡыҙылъяр ауылында донъяға килгән. Кесе йәштән үк эшкә йылдам, егәрле ҡыҙ үҫә төшкәс донъя тотҡаһына әйләнә.

Бар Совет иле тыныс ҡына йәшәп ятҡанда фашист илбаҫарҙары Ватаныбыҙға ябырыла. Һуғыш алдынан 40 көнлөк кенә әҙерлеккә тип алынған бер туған Мырҙағәле ағаһы, шул китеүҙән яуға инә һәм бөтөнләй әйләнеп ҡайтмай. Бөгөн бабайымдың исеме мәктәп алдындағы таҡтаташҡа уйып яҙылған.

Беренсе көндән үк бөтә халыҡ еңеү өсөн бар көстәрен һала. Ошо осор балаларының бала сағы, ә үҫмерҙәрҙең йәшлеге булмай. Өләсәйем дә уҡыуын ҡалдырып, колхоз эшенә сыға. Ул башҡа ҡатын-ҡыҙҙар менән бергә урман да киҫә, Ҡарлыман станцияһынан орлоҡтар ҙа ташый, игенен дә сәсә. Ас-яланғас булыуҙарына ҡарамаҫтан, ул быуын кешеләренең рухтары, илһөйәрлек тойғоһо көслө булған.

Еңеүҙән һуң, сыныҡҡан ҡыҙ ағас эшенә йөрөй, хужалыҡты, илде аяҡҡа баҫтырыуҙа ҡатнаша. Бер аҙ ваҡыт үткәс, олатайым Яхияға кейәүгә сыға. Икеһе лә урындағы колхозда хеҙмәт итә. Дүрт балаға ғүмер бирә улар. Өләсәйем, әле лә оло йәштә булыуына ҡарамаҫтан, йорт мәшәҡәттәрендә ҡулынан килгәнсә булыша, бәйләм бәйләй, гәзит-журналдар ҙа уҡырға ярата. Ул беҙгә тыныс тормоштоң ҡәҙерен белергә, һәр тыуған көндөң матурлығын, мәғәнәһен тойоп йәшәргә өйрәтә.

Дәшһәтле йылдарҙа тыуған, үҫеп буй еткереп намыҫлы хеҙмәт иткән олатай-өләсәйҙәр беҙҙең өсөн өлгө. Улар оло хөрмәткә лайыҡ.

Л.Ҡужәхмәтова.

Абҙан ауылы.

Дилара Бәҙретдинова фотоһы.