Ҙур әһәмиәткә эйә булыр йыл

Башҡортостан республикаһы Башлығы Радий Хәбиров:— Башҡорт теле йылы ҙур әһәмиәткә эйә булыр тип ышанам. Беҙгә телде үҙләштереүҙе үҙгәртеү мөһим. Уны көсләп тағырға түгел, киреһенсә, ошо телдең ниндәй матур, боронғо һәм аҙағынаса өйрәнелмәгән икәнен күрһәтергә кәрәк. Туған телде республикала өйрәнеүҙән тыш, уны Башҡортостандан ситтә лә үҫтереү зарур. Башҡорт теле республика сиктәренән сыҡһын, матур, тәрән аҡыллы башҡорт мәҡәлдәре башҡорт телендә аралашҡан һәр кемдең һүҙлек запасына, рәсәйҙәрҙең ҡулланылышына инһен өсөн беҙгә бергәләп уйларға кәрәк.

“Бөтә донъя башҡорттары ҡоролтайы” йәмәғәт ойошмаларының халыҡ-ара берлегенең Башҡорт теле йылын үткәреү тураһында башланғысы Башҡортостан республикаһы Башлығы тарафынан хуплау тапты. Уның маҡсаты — йәмәғәтселектә башҡорт телен өйрәнеүгә, башҡорт мәҙәниәте һәм әҙәбиәтенә ҡыҙыҡһыныу уятыу, башҡорт телен популярлаштырыу, республикала һәм унан ситтә, башҡорттар күпләп йәшәгән төбәктәрҙә, башҡорт телен уҡытыу шарттарын яҡшыртыу, дәүләт теле булараҡ телебеҙҙең ҡулланыу даирәһен үҫтереү.

Районыбыҙҙа ла ошо уңайҙан матур, киң күләмле саралар ойошторолоу ҡаралған. Уларҙың нисек һәм ҡасан үтеүе тураһында район мәғариф бүлеге методисы Лена Садиҡова таныштырып китте:

—Туған телебеҙгә арналған йыл сараларға бик бай буласаҡ. Уларҙы юғары кимәлдә бойомға ашырыу маҡсатынан, иң башта, ойоштороу комитетының кәңәшмәһен йыйҙыҡ. Методик күрһәтмәләргә таянып, башҡорт телен дәүләт теле булараҡ үҫтереү, Башҡорт теле йылына бәйле саралар буйынса төрлө тәҡдимдәр индерелеп, эш планы төҙөлдө.

Башҡорт теле йылы 2020 йылдың ғинуарынан алып декабргә тиклем дауам итәсәк. Ағымдағы йылдың 14 декабрендә йомғаҡ яһаласаҡ. Тәҡдим ителгән саралар түбәндәге йүнәлештәр буйынса үтәсәк: ғинуар айы — “Башҡорт теле дәүләт теле”, февраль — “Башҡорт теле — заманса тел”, март — “Башҡорт теле — ғаилә теле”, апрель — “Башҡорт теле — әсә теле”, май — “Башҡорт теле — еңеүселәр теле”, июнь — “Башҡорт теле — халыҡ теле”, июль — “Башҡорт теле — дуҫлыҡ теле”, август — “Башҡорт теле — юлдаш теле”, сентябрь — “Башҡорт теле — ижад теле”, октябрь — “Башҡорт теле — тарих теле”, ноябрь — “Башҡорт теле — моңло тел”, декабрь — “Башҡорт теле — рух теле”. Һәр айҙа айырым йүнәлешкә арналған тематик дәрестәр, ижади бәйгеләр, түңәрәк өҫтәлдәр, конкурстар ойоштороласаҡ. Мәҫәлән, “Башҡорт теле — заманса тел” айлығында Туған тел, Башҡорт теле көндәренә арналған дәрестәр, Шәйехзада Бабичтың тыуыуына — 125, Рәми Ғариповҡа 90 йыл тулыу айҡанлы район сәсәндәр конкурсы ойоштороласаҡ. Шулай уҡ төп иғтибар алтаҡталарҙағы грамматик хаталарҙы табыу һәм төҙәтеүгә йүнәлтеләсәк.

Беҙҙең барыбыҙҙы ла ҙур ижади, эҙләнеү эштәре көтә. Райондаштарыбыҙҙың олоһо ла, кесеһе лә сараларҙа әүҙем ҡатнашып, туған телебеҙҙе артабан үҫтереүҙә үҙ өлөшөн индерер тигән өмөт бар. Ғөмүмән, Башҡорт теле йылы тарихыбыҙҙа әһәмиәтле тәрән эҙ ҡалдырыр тип ышанам.

Дилара Бәҙретдинова.

Читайте нас:

Адресы: 453030, Архангельский район, с. Архангельское, ул. Советская, 18

Телефондар:

Баш мөхәррир: 83477421457

Реклама хеҙмәте: 8-347-74 (2-18-66)

Редакция: 8-34774 (2-12-87)

Кадрҙар бүлеге: 8-34774 (2-18-44)

Электрон почта: [email protected]