“Зәңгәр рауза” уңышҡа юл аса

Балалар сәнғәт мәктәбенең йәш тәрбиәләнеүселәре ”Зәңгәр рауза” халыҡ-ара фестиваль конкурсында еңеү яуланы! Был сара ижади һәләттәрҙе (вокал, хореография, театр сәнғәте) асыуға йүнәлтелгән. Унда Рәсәйҙән генә түгел, шулай уҡ сит ил вәкилдәре лә оҫталыҡтарын күрһәтә. Бәйгене ойоштороусы — “Мираҫ” фестиваль үҙәге. Уның маҡсаты — конкурста ҡатнашыусыларҙың ижади һәләттәрен асыу өсөн уңайлы шарттар булдырыу, заманса йүнәлешле һәм яңы стилдәге һөнәри тәжрибә менән уртаҡлашыу.

8 декабрҙә Өфөлә балалар филармонияһында сығыш яһап, “Умырзая” башҡорт фольклоры ансамбле (етәксеһе Айгөл Ҡунаҡбаева) 2 дәрәжә лауреат исеменә лайыҡ булды.

Улар башҡорт йолаһынан өҙөк тәҡдим итте. “Халыҡ вокалы” номинацияһында заманса яңғырашлы “Әпипә”не йырлап, Сөләймәнова Нурсилә — 2 дәрәжә, “Эстрада вокалы” буйынса “Татыу ғаилә”не (Г.Ишҡыуатова һүҙҙәре һәм көйө) башҡарып, Джәмилә Агабаева 2 дәрәжә дипломант 8-10 йәшлектәр араһында “Музыка театры”нда — 2 дәрәжә диплом. Балалар һәм йәштәр араһында мәҙәниәт һәм сәнғәтте үҫтереүгә тос өлөш индергәне, ижади эшмәкәрлеге өсөн Айгөл Зәкиулла ҡыҙы “Мираҫ” фестиваль үҙәгенең Рәхмәт хаты менән бүләкләнде.