"Халыҡ фекере менән шаярырға ярамай"

Башҡортостан Башлығы вазифаһын ваҡытлыса башҡарыусы Радий Хәбиров баш ҡаланың 109-сы һайлау участкаһына ҡатыны менән бергә тауыш бирергә килгән.

– Бөгөн Башҡортостан өсөн үтә яуаплы көн. Һайлау кампанияһын үткәреү өсөн беҙ етди эш башҡарҙыҡ. Башҡортостан Башлығын һайлауҙан тыш, республика халҡы бөгөн ете меңдән ашыу урындағы советтарҙың депутаттарын да һайлай.

Төп маҡсатыбыҙ – һайлауҙар асыҡ һәм ҡануниәткә ярашлы үтергә тейеш. Миңә ҡалһа, беҙ быға өлгәштек. Һайлау һөҙөмтәләрен бөгөн төндә беләсәкбеҙ. Ҡасандыр бер әйткән инем: халыҡ фекере менән уйнарға ярамай, быға бик яуаплы ҡарарға кәрәк. Әлеге мәғлүмәттәр буйынса, һайлау кампанияһы яҡшы бара, халыҡ ҙур әүҙемлек күрһәтә, – тине Радий Фәрит улы.

"Башҡортостан" гәзитенән