Сәләмәтлек мәктәбе

“Берҙәм Рәсәй” сәйәси партияһының төбәк аппараты яҡлылар башланғысы менән халыҡҡа сәләмәт йәшәү рәүеше принциптары, үҙ-үҙеңде диагностикалау һәм онкосирҙәрҙе профилактикалау тураһында мәғлүмәт биреү маҡсатында үҙәк район дауаханаһы базаһында табип-онколог Гөлнур Ниғмәнова (Өфө ҡалаһы) тарафынан яман шештән һаҡ булыу темаһына лекция уҡылды, шулай уҡ слайдтар презентацияһы уҙғарылды.

Гөлнур Хәмзә ҡыҙы — “Иң яҡшы табип —2018” конкурсы лауреаты. Уның материалы ҡыҙыҡһындырырлыҡ итеп бирелде. Слайдтарҙа шештәрҙең ниндәй урындарҙа барлыҡҡа килеүе күрһәтелде, “ономаркер” төшөнсәһе аңлатылды. Ракты профилактикалау мөһимлеге еткерелде.

Лекция тамамланғас, Г.Х.Ниғмәнова һорауҙарға яуап бирҙе.