«Йәшел Башҡортостан» акцияһы

Республикала «Йәшел Башҡортостан» акцияһы барышында 17 мең эре ағас һәм 4 мең ҡыуаҡлыҡ ултыртыу күҙаллана, тип һөйләне торлаҡ-коммуналь хужалыҡ министры вазифаһын башҡарыусы Михаил Кирәев Хөкүмәттәге оператив кәңәшмәлә.

Тәүге этап 27 апрелгә — икенсе дөйөм республика өмәһенә тәғәйенләнгән.

Муниципалитеттарҙа тематик аллеялар өсөн 57 ер участкаһы билдәләнгән. Ҡарағай, шыршы, ҡайын, йүкә, тирәк ағастары, барбарис, спирея, гөлйемеш, миләш ҡыуаҡтары ултыртыу ҡаралған.

Акция йомғаҡтары буйынса «Йәшел Башҡортостан» фотоконкурсы ойошторола — ҡатнашыу өсөн акцияға килергә, ағас ултыртырға, фотоға төшөргә һәм уны #йәшелБашҡортостан2019 хештегы менән социаль селтәргә һалырға кәрәк. Еңеүселәрҙе «Бергәләп күңеллерәк» һәм «Минең урманым — минең киләсәгем» номинацияларында «лайк»тар һаны буйынса билдәләйҙәр.