“Зәңгәр экран”дар яҡшыра

Район халҡы юғары сифатта 20 каналды бушлай ҡарай ала башланы, шулай ҙа телевидение зонаһына инмәгән тораҡ пункттары бар. Улар эсенә Аҫҡын, Үрге Ләмәз, Үрге Фроловка, Ҡарағай, Ҡыҙғы, Ҡыҙыл Ырғыҙлы, Михайловка, Петропавловка, Приураловка, Родинка, Уҫаҡлы, Сикйылға һәм Яркинский ауылдары инә. Унда бөтәһе 867 кеше йәшәй.

Ошо көндәрҙә Приураловка ауылы халҡына дәүләт иҫәбенә тәүге юлдаш тәрилкәләре ҡуйылды. Цифрлы эфир телевидениеһы зонаһында йәшәмәгәндәргә спутник ҡорамалын һатып алыуҙа һәм ҡуйыуҙа дәүләт ярҙамы күрһәтелә. Әлеге ваҡытта республика буйынса спутник ҡорамалын һатып алыуға һәм ҡуйыуға 300-ҙән ашыу ғариза килгән. Ғаризалар 3 июнгә тиклем ҡабул ителә. Ярҙамға граждандарҙың ике категорияһы хоҡуҡлы: пенсияһына федераль социаль өҫтәмә алған пенсионерҙар һәм аҙ тәьмин ителгән балалы ғаиләләр.