Ямандан һаҡлан

Тормошта күптәр изге уй-хыялдарын ысынбарлыҡҡа әйләндереп, маҡсатлы ғүмер кисерергә тырыша. Йәштәр үҙҙәрен төрлө өлкәлә һынай, яңы үрҙәргә ынтыла. Тик араларында рухы һынып, башҡалар ҡотҡоһона бирелеп, юлдан яҙғандары ла осрап ҡуя. Шунлыҡтан ата-әсәләр балаларының яҙмышын хәстәрләргә бурыслы. Сөнки яман ғәҙәттәргә йәлеп итергә маташыусы әҙәмдәр йәш быуынды үҙ тоҙағына эләктерергә генә тора. Үҫмерҙәрҙең яңылышыуы ғаиләһен генә түгел, тотош йәмғиәтте хәүефкә һала.

Мәктәп уҡыусылары ВИЧ-инфекцияһы, СПИД, наркотиктар, спайс тураһында төплө мәғлүмәтле булһа, күңелһеҙ хәл-ваҡиғаларға урын ҡалмаҫ. Яман ауға абайламай эләкмәһендәр өсөн йоғошло сирҙәр, уларҙың һаулыҡҡа зыяны, ВИЧ-инфекцияның таралыу юлдары, һуңғы стадияһы — СПИД хаҡында һәм уларҙың аяуһыҙ эҙемтәләргә килтереүен улар яҡшы белергә тейеш.