“Бесәйҙең өйө”

Салауат башҡорт дәүләт драма театры район мәктәптәре уҡыусылары иғтибарына Самуил Маршактың “Бесәйҙең өйө” һәм Эрик-Эммануил Шмиттың “Аллаға 14 хат” әҫәрҙәре нигеҙендә спектаклдәр тәҡдим итте.

Уйын-көлкөгә әүрәп янғын хәүефһеҙлеген онотҡан Бесәйҙең өйһөҙ ҡалыуы, дуҫтың көлгәндә түгел, ә бөлгәндә беленеүен бәйән иткән “Бесәйҙең өйө” спектаклен кескәйҙәр ихлас ҡабул итте. Ут менән шаярыуҙың ниндәй һөҙөмтәгә килтереүе тураһындағы сәхнә әҫәре түбән синыф уҡыусылары өсөн фәһемле һабаҡ булды.

Э.Э.Шмитт әҫәре буйынса ҡуйылған “Аллаға 14 хат” спектаклен тамашасылар оло тулҡынланыу менән ҡараны. “Беҙ ни өсөн йәшәйбеҙ? Йәшәү асылы нимәлә һәм ваҡытыбыҙҙы нимәгә әрәм итәбеҙ? Ни өсөн тормоштоң ҡәҙерен аңлау тик үлем алдынан ғына килә?”—тигән һорауҙарға Раштыуа байрамы ваҡытында дауаханала яман шеш ауырыуы менән көрәшкән Оскар исемле бәләкәй малай образы аша яуап алына. Мәрхәмәтлелек, ғәҙеллек, яҡын кешеләреңдең, тормоштоң ҡәҙерен белеү, бер-береңә иғтибарлы һәм ихтирамлы булыу темаларын яҡтыртҡан спектакль уҡыусыларға әхлаҡи тәрбиә бирҙе.

Дилара Бәҙретдинова.