Ҡояшым һин —әсәй-өләсәй

“Тирмәкәй” балалар баҡсаһында Әсә көнөнә арналған спорт сараһында кескәйҙәр иң ҡәҙерле кешеләре менән бергәләп күңел асты. Уны физкультура буйынса инструктор Н.С.Штейнард һәм тәрбиәсе С.Б.Тараканова ойошторҙо.

“Йәйғор” һәм “Нур” командалары стартҡа баҫты. Тәүгеһе — “Шәп һыбайлы”ла балалар әсәй-өләсәйҙәре менән обруч кейеп тиҙлектә һынау тотто, ”Золушка”ла йәһәт кенә тирә-яҡҡа һибелгән уйынсыҡтарҙы йыйыуҙа һынатманы. “Әсәйеңә гөлләмә йый” ҙа бигерәк йәнле барҙы.

Дәртле ритмлы көй яңғырауға тәрбиәсе Л.М.Сөләймәнова төркөмөнә йөрөүсе кескәйҙәр төрлө күнегеүҙәр яһап, командаларҙы көсөргәнешле уйындарҙан ял иттереп алды.

Шат тауыштар яңғырай, һәр кемдең йөҙө балҡый. Был юҡҡа түгел, алдағыһы — “Ҡояш” тип исемләнгәне уны тиҙерәк “нурҙар” ярҙамында яҡтыртып ебәреүҙе маҡсат итеп ҡуйғайны. “Һөҙгөс” шарҙар ярҙамында бәләкәстәрҙе сәмләндереп еңеүгә талпындырҙы. Әкиәт буйынса “Шалҡан” ярышы барыһына ла дәрт-дарман ғына өҫтәне. Үҙенсәлекле спорт бәйгеһендә дуҫлыҡ еңде! Байрам әсәйҙәргә бағышланған йыр һәм күмәк бейеү менән йомғаҡланды.