Башҡортостанда ике егерҙең һунары берәүһенең үлеме менән тамамланған

Башҡортостандың Тәфтиш комитеты Архангел районында йәшәгән 48 йәшлек иргә ҡарата «һаҡһыҙлыҡ арҡаһында үлемгә дусар итеү» статьяһы буйынса енәйәт эше ҡуҙғатҡан.

Төбәк тәфтиш идаралығының матбуғат хеҙмәтенән хәбәр итеүҙәренсә, 11 ғинуарҙа иртән ике ир һунарға киткән. 48 йәшлек ир йәнлеккә атам тип уйлап асыҡ күренмәгән урынға атҡан. Пуля икенсе 48 йәшлек һунарсының кәүҙәһенә эләккән, эске органдарын йәрәхәтләгән. Зыян күреүсе вафат булған. Уларҙың икеһе лә Архангел районында төрлө участкаларҙа егерь булып эшләй.

«Әлеге ваҡытта енәйәттең сәбәптәрен асыҡлауға йүнәлтелгән тәфтиш эштәре һәм оператив-эҙләү саралары алып барыла. Шаһиттарҙан һорау алалар. Зыян күргән һунарсының үлем сәбәбен билдәләү өсөн суд-медицина экспертизаһы тәғәйенләнгән», — тип аңлатма бирҙеләр ведомствола.