Йәмле ихатаға ни етә?

“Башҡортостан ихаталары” программаһын бойомға ашырыу өсөн 2019 йылда 1,7 миллиард һум йүнәлтеләсәк. Аҡсаның 99 проценты республика ҡаҙнаһынан бүленһә, бер проценты халыҡтан йыйыласаҡ.

– Республика буйынса 2019 йылдың йәйендә 480 ихата биләмәһе төҙөкләндереләсәк, ә алдағы 5 йылда 2903 ихата яңыртыласаҡ. Ағымдағы йылда Архангел ауылының Совет урамының 50, 54-се, шулай уҡ Лазо урамы 4-се һанлы йорттарҙың ихаталары яңы төҫ аласаҡ. Башҡортостан Республикаһы Башлығы вазифаһын ваҡытлыса башҡарыусы Радий Хәбиров белдереүенсә, унда балалар майҙансыҡтарына, резина япмаға, урналарға, эскәмйәләргә, стендтарға, видеокүҙәтеүгә, яҡтыртыуға, йәшелләндереүгә, парковка урындарына баҫым яһаласаҡ,- тине райондың төҙөлөш, торлаҡ-коммуналь хужалығы һәм муниципаль һатып алыуҙар бүлеге начальнигы Семен Дунаев.

Республикала ихата биләмәләрен төҙөкләндереү эштәрен 2019 йылдың 15 майында башлау һәм 31 августа тамамлау күҙаллана.

Альберт Рәхимов.