Һөйләшәһе һүҙҙәр байтаҡ

Липовка ауыл биләмәһендә уҙған граждандар йыйылышына барлыҡ ауыл халҡы ҡатнашты. Ауыл хакимиәте башлығы Илдар Әбдрәфиҡов көнүҙәктә торған янғын хәүефһеҙлеге мәсьәләһе тураһында бәйән итте. Районда янғын сығыу осраҡтары, шул сәбәпле кеше ғүмерҙәренең өҙөлөүе хаҡында һөйләп, граждандарҙы уяу булырға саҡырҙы.

Урындағы ветеринария участкаһы мөдире А.В.Сотников малдарҙы идентификациялау, һатып йәки сит ерҙән алып ҡайтҡандан һуң уларҙы теркәү һәм башҡа тейешле процедураларҙы ҡәтғи башҡарыу тураһында аңлатты, һорауҙарға яуап бирҙе. Артабан урмандағы ҡороған, йә ел ауҙарған ағастарҙы бушлай алыу тәртибе менән урман хужалығы хеҙмәткәре Ф.Р.Хәжиәхмәтов таныштырҙы. Шулай уҡ ҡаты көнкүреш ҡалдыҡтарын шәхси хужалыҡтарҙан нисек йыйыу, сорттарға айырыу хаҡында ла әйтелеп үтелде.

Дилара Бәҙретдинова.